Ambasada e Shteteve të Bashkuara në Prishtinë shprehu të dielën shqetësimin për siç tha mbylljen e papritur dhe të pabashkërenduar të zyreve për Punë Sociale të Serbisë në veri të Kosovës, një veprim që siç u tha mund të dëmtoj marrëdhëniet ndërmjet dy vendeve.
Në një reagim përmes rrjeteve sociale, ambasada amerikane tha se “këto dhe veprime të ngjashme ndikojnë negativisht në mijëra qytetarë të Kosovës dhe rrezikojnë të krijojnë pasoja negative për të ardhmen e Kosovës në Evropë dhe marrëdhëniet tona dypalëshe”.
Policia tha se aksioni pasoi arrestimin e katër zyrtarëve të kësaj qendre në Zubin Potok me 8 shkurt, nën dyshimin për veprën “cenim i vullnetit të votuesve”.
Sipas policisë zyrtarët e Qendrës për Punë Sociale, dyshohet se nëpërmjet kërcënimit i kanë detyruar apo udhëzuar qytetarët se si të votojnë, duke i kushtëzuar ndihmat sociale me votën e tyre në favor të një partie të caktuar politike”.
Lista Serbe, subjekti kryesor i serbëve të Kosovës që mbështetet nga Beogradi fitoi shumicën e votave të serbëve në zgjedhjet parlamentare të mbajtura gati dy javë më parë në Kosovë. Kjo listë po synon të mbajë 10 vendet e rezervuara për komunitetin serb në parlamentin e Kosovës.
Misioni i Bashkimit Evropian për Vëzhgimin e Zgjedhjeve në raportin vlerësues për procesin e zgjedhjeve tha se shumë bashkëbisedues raportuan për trysni nga anëtarët e Listës Serbe ndaj votuesve dhe se kishte ndërhyrje të hapur dhe të përsëritur nga Serbia.
Zgjedhjet parlamentare të 9 shkurtit shënuan edhe rikthimin e pjesëtarëve të komunitetit serb në proceset zgjedhore në Kosovë pas bojkotimit të disa proceseve të kaluara si zgjedhjet e fundit lokale.
Marrë nga VOA (Zëri i Amerikës)
