Shteti ukrainas ka reaguar së fundmi mbi vendimin e administratës së Trump për të bllokuar të gjitha ndihmat ushtarake për Ukrainën pas debatit të famshëm mes Volodymyr Zelenskyt dhe Donald Trump disa ditë më parë në Shtëpinë e Bardhë.
Kryetari i Komitetit Parlamentar të Punëve të Jashtme Oleksandr Merezhko, e ka cilësuar këtë vendim si një goditje politike, me qëllim shtyrjen e Ukrainës drejt pranimit të një paqe me kushtet e tmerrshme të Rusisë.
“Në sipërfaqe, kjo duket shumë keq. Duket sikur po na shtyn drejt kapitullimit, që do të thotë (pranim) kërkesat e Rusisë. Gjëja kryesore është se kjo një goditje psikologjike, një goditje politike ndaj Ukrainës, nuk e ndihmon shpirtin tonë.”
Gjithashtu liderët europianë janë shprehur kundër këtij vendimi, i cili dëmton rëndë negociatat drejt arëmpushimit, duke theksuar dhe njëherë mbështetjen për Ukrainën.
“Në thelb, nëse doni paqe, një vendim për pezullimin e armëve në Ukrainë e përforcon paqen apo e bën atë më të largët?”, tha ministri francez për Evropën, Benjamin Haddad, për France 2. “Kjo e bën atë më të largët, sepse vetëm forcon dorën e agresorit në terren, që është Rusia”.
“Ne mbetemi absolutisht të përkushtuar për të siguruar një paqe të qëndrueshme në Ukrainë dhe po angazhohemi me aleatët kryesorë në mbështetje të kësaj përpjekjeje”, tha një zëdhënës i qeverisë britanike në një deklaratë. “Është gjëja e duhur për të bërë dhe është në interesin tonë ta bëjmë këtë.”
Një reagim i menjëhershmë ka ardhur dhe nga shefja e Komisionit Europian Ursula von der Leyen, e cila u shpreh se Bashkimi Europian është gati për të mobilizuar 800 miliardë euro shpenzime për mbrojtjen e Europës, përfshirë këtu dhe Ukrainën.
“Ky është një moment për Evropën dhe ne jemi gati të rritemi. Riarmatosja e Evropës mund të mobilizojë afër 800 miliardë euro shpenzime të mbrojtjes për një Evropë të sigurt dhe elastike”, njoftoi von der Leyen në Bruksel.
Marrë nga Newsbomb.al
