Zëdhënësja e Shtëpisë së bardhë Karoline Leavitt hodhi poshtë njoftimet e mediave amerikane se Presidenti Donald Trump do ta nënshkruante sot urdhërin për mbylljen e Departamentit të Arsimit.
Urdhri mund të nënshkruhet të enjten sipas gazetës, e cila i referohej personave në dijeni të çështjes, por pa i identifikuar ata.
Presidenti Trump ka bërë vazhdimisht thirrje për eliminimin e departamentit, duke e quajtur veprimtarinë e tij “një mashtrim të madh”.
Ai propozoi mbylljen e tij që në mandatin e parë si president, por Kongresi nuk veproi.
Republikanët kanë kërkuar prej kohësh mbylljen e departamentit. Sekretarja e Arsimit Linda McMahon, e cila u konfirmua nga Senati të hënën, ka mbrojtur planin e Presidentit Trump për të mbyllur agjencinë.
Por mbrojtësit e Departamentit thonë se është thelbësore që të ruhen standardet e arsimit të lartë publik si dhe akuzojnë republikanët se po përpiqen ta shdërrojnë arsimimin, në fitimprurës.
Një mbyllje e menjëhershme e departamentit mund të krijonte probleme për ndihmën prej dhjetëra miliarda dollarësh që marrin shkollat, duke filluar nga arsimi elementar, tek shkolla e mesme, apo për ndihmën që marrin studentët në kolegj.
Presidenti Trump tha muajin e kaluar se donte që departamenti të mbyllej menjëherë, por pranoi se për këtë do të nevojitej mbështetja e Kongresit që miraton fondet për departamentin.
Zonja McMahon u tha senatorëve se mbyllja e departamentit do të kërkonte miratim të Kongresit. Ajo premtoi në mënyrë të përsëritur se fondet federale për të ndihmuar distriktet shkollore me të ardhura të ulëta dhe studentët, do të vazhdojnë.
Presidenti Trump dhe këshilltari i tij, biznesmeni miliarder Elon Musk janë përpjekur të çmontojnë, pa miratimin e Kongresit, programe dhe institucione qeveritare, siç ishte rasti me Agjencinë Amerikane për Zhvillim Ndërkombëtar (USAID), por një mbyllje e Departamentit të Arsimit, do të shënonte mbylljen e parë të një agjencie në nivel kabineti qeveritar.
Departamenti mbikëqyr rreth 100,000 shkolla publike dhe 34,000 private, por më shumë se 85% e financimit për shkollat publike sigurohen nga shtetet.
Departamenti u jep fonde federale shkollave dhe programeve që kanë nevojë, përfshirë fonde për të paguar mësuesit e fëmijëve me nevoja të veçanta, apo duke financuar programe artistike, si dhe rinovimin e infrastrukturës shkollore të vjetëruar.
Departamenti mbikëqyr gjithashtu 1.6 trilionë dollarë në kredi studentore për dhjetëra miliona amerikanë, të cilët nuk mund të përballojnë pagesën për universitetin.
Gjatë administratës Biden, republikanët e kritikuan departamentin kryesisht për nismën për faljen e huave studentore , si dhe politikat që lidhen me diversitetin, barazinë dhe programet e gjithëpërfshirjes.
Marrë nga Reuters
