Banorët e Tropojës dhe Hasit vijuan për të dytën herë këtë të hëne protestën për rrugën e amortizuar rreth 20 km, Kam-Qafë Prush, duke bllokuar edhe hyrjen për në pikën e kalimit kufitar të Qafë Prushit në Has.
Përfaqësues nga 20 fshatra të bashkive Has dhe Tropojë kërkuan me ngulm rikonstruksionin e rrugës që lidh fshatrat me aksin kombëtar, Krumë-Qafë Prush-Gjakovë, pavarësisht premtimeve që janë dhënë gjatë 30 viteve të fundit.
Banorët thanë se nuk do të dalin në votime më 11 maj, nëse nuk asfaltohet aksi 20 km që është e pakalueshme dhe u shërben 2 mijë banorëve.
Në përkrahje të protestës së banorëve, i pranishëm ishte edhe Kryetari i Bashkisë Has, Miftar Dauti.
Rruga, e ndërtuar që në vitin 1938 për shfrytëzimin e burimeve minerale, nuk është mirëmbajtur dhe është e pakalueshme për shkak të gropave në të gjithë gjatësinë e saj.
Marrë nga Syri.net
