Qeveria britanike, me urdhrin e Sekretares të Brendshme Yvette Cooper, ka njoftuar publikimin për herë të parë të tabelave të krimit sipas kombësive të migrantëve. Sipas tyre kjo nismë synon të rrisë transparencën dhe të ofrojë informacion të detajuar për publikun mbi përfshirjen e shtetasve të huaj në aktivitete kriminale në Mbretërinë e Bashkuar.
Tabelat e reja do të rendisin kombësitë me normat më të larta të krimit, duke përfshirë të dhëna për individët që presin deportimin. Sipas burimeve të qeverisë, shqiptaret, rumunët dhe polakët pritet të jenë ndër grupet kryesore të përfshira në aktivitete kriminale. Ky konkluzion ka ardhur pas një analize të mëparshme e cila tregoi se një nga 50 shqiptarë në Mbretërinë e Bashkuar ndodhet në qeli.
Kjo nismë e re e qeverisë britanike ka marrë mbështetje edhe nga disa deputetë të Partisë Konservatore, përfshirë Robert Jenrick, ish-ministër i Migracionit, i cili e ka cilësuar këtë si një hap të rëndësishëm drejt transparencës dhe forcimit të masave të deportimit. Ai ka theksuar se publiku ka të drejtë të dijë lidhjen midis migracionit dhe krimit .
“Pas një viti presioni nga aktivistët, duke përfshirë përpjekjen time për të ndryshuar ligjin, duket se ka pasur një përparim. Publiku britanik meriton të vërtetën rreth krimit të emigrantëve dhe kostove të imigracionit me aftësi të ulëta,” tha ai.
Nga ana tjetër, disa grupe të shoqërisë civile dhe deputetë të Partisë Laburiste kanë shprehur shqetësim se publikimi i kombësive të përfshira në krime mund të nxisë racizëm dhe paragjykime. Ata paralajmërojnë se kjo mund të thellojë ndasitë shoqërore dhe të shkaktojë tensione të ngjashme me ato të vitit të kaluar .
Të dhënat e mëparshme që mbulonin krimet e kryera nga të huajt midis viteve 2021 dhe 2023, të zbuluara nga The Telegraph, treguan se rumunët përbënin numrin më të lartë me 15,701, të ndjekur nga polakët dhe shqiptarët. Megjithatë, thuhet se norma për shqiptarët, 4,028 për 10,000 regjistruar në Angli dhe Uells i nxjerr në krye të tabelës
Nga ana tjetër një burim i Ministrisë së Brendshme ka theksuar se çdo shtetas i huaj që abuzon me mikpritjen e Britanisë dhe kryen krime të rënda do të përballet me forcën e plotë të ligjit dhe do të largohet nga vendi sa më shpejt të jetë e mundur. Ky hap është pjesë e një strategjie më të gjerë për të rritur sigurinë publike dhe për të siguruar që sistemi i drejtësisë të jetë i drejtë dhe i barabartë për të gjithë
Publikimi i këtyre të dhënave pritet të bëhet në fund të vitit, pas rikthimit të Parlamentit nga pushimet e Pashkëve, dhe do të ofrojë një pasqyrë të detajuar mbi përfshirjen e shtetasve të huaj në aktivitete kriminale në Mbretërinë e Bashkuar.
Marrë nga The Telegraph
