Qeveria shqiptare do të ngrejë tre ditë para zgjedhjeve një avion në fluturim për të inauguruar aeroportin e Vlorës. Zëvendëskryeministrja Belinda Balluku njoftoi se më datë 8 Maj do të kryhet fluturimi i parë nga Aeroporti Ndërkombëtar i Vlorës, i cili do të jetë testi i parë i këtij aeroporti. Pas kësaj aeroporti do të mbyllet sërish.
“Më datë 8 maj, vetëm pas pak ditësh, do kemi testin e parë te uljes në pistën prej 3.2 kilometrash këtu në Vlorë duke i lënë pastaj gjithë kohën disa mujore, por brenda sezonit veror për të nisur operimet zyrtare nga Aeroporti i Vlorës, aeroporti i gjithë shqiptarëve” – tha Balluku.
Gjithashtu në fjalën e saj gjatë një takimi në qytetin e Vlorës me fokus ecurinë e projekteve strategjike në fushën e transportit, ku i pranishëm ishte dhe kryeministri Edi Rama, Balluku tha se: Ndonëse Shqipëria ka 350 km vijë bregdetare në detin Adriatik dhe detin Jon, nuk ishte pjesë e korridoreve të transportit ndërkombëtar dhe as e njohur si një nyje logjistike e rëndësishme pavarësisht lokacionit gjeografik që Shqipëria ka.
Sipas zv.kryeministres Balluku, në vitin 2013 qeveria shqiptare nisi një reformë për të ndryshuar gjithçka dhe për t’i dhënë një vlerë tjetër detit, për ta kthyer nga një kufi ndarës, në një motor energjik të ekonomisë shqiptare.
“Reforma u vendos në disa shtylla të rëndësishme duke nisur nga një ndarje funksionale e qartë, ndarja e porteve me karakter tregtar apo ato me karakter turistik për të krijuar specializim mes këtyre porteve, eficiencë dhe për të qenë konkurrentë në tregun ndërkombëtar. Një tjetër shtyllë e strategjisë, është integrimi në rrjetet dhe korridoret ndërkombëtare. Portet shqiptare nuk janë më pika të izoluara në bregdet, por nyja të lidhura ngushtë me rrugët, hekurudhat, korridoret e autostradave, të cilat tashmë janë korridore të njohura nga stoku i korridoreve paneuropiane duke i kthyer në nyje aktive dhe pjesë të qenësishme të ekonomisë shqiptare dhe jo më të izoluara” – shtoi Balluku.
Ndërtimi dhe bërja funksional i Aeroportit të Vlorës do të krijojë 1200 vende pune për të gjithë ata persona, që duan të punojnë dhe kontribuojnë në sektorin e Aviacionit Civil.
Marrë nga Kapitali.al
