Forcat izraelite bombardojnë Gazën, duke vrarë të paktën 50 persona që nga mesnata, pasi ushtria u urdhëroi palestinezëve në qytetin jugor të Khan Younis të largohen përpara një “sulmi të paparë”.
“Bombardimet izraelite në Gazës vazhduan nga mesnata deri në orët e para të ditës, duke shkaktuar vdekjen e 50 personave, kryesisht gra dhe fëmijë, si dhe dhjetëra të plagosur, pas masakrave të reja të kryera nga pushtuesi…në disa zona të Rripit të Gazës”, tha zëdhënësi i Mbrojtjes Civile, Mahmoud Bassal, për AFP, përcjell A2 CNN.
Ndërkohë presioni ndërkombëtar është shtuar mbi Izraelin për shkak të ofensivës së tij të re ushtarake në Gaza, e cila ka lënë qindra të vdekur vetëm në ditët e fundit.
Udhëheqësit e Kanadasë, Francës dhe Mbretërisë së Bashkuar kërcënojnë të ndërmarrin “veprime konkrete” kundër Izraelit, nëse ky i fundit nuk i jep fund ofensivës së tij të ripërtërirë në Gaza, ndërsa 22 vende i kërkojnë Izraelit të lejojë hyrjen e ndihmave në enklavën e rrethuar.
Kryeministri izraelit Benjamin Netanyahu i hedh poshtë thirrjet dhe premton të vazhdojë ofensivën, e cila përfshin plane që Izraeli të marrë kontrollin e të gjithë Gazës.
Që nga 2 marsi, nuk është lejuar futja e ushqimit, karburantit apo ilaçeve në Gaza, një situatë që OKB-ja më parë e përshkroi si një “ndikim katastrofik” për popullsinë palestineze.
Lufta e Izraelit në Gaza ka vrarë të paktën 53,475 palestinezë dhe ka plagosur 121,398 të tjerë, sipas Ministrisë së Shëndetësisë së Gazës. Zyra e Medias e Qeverisë e përditësoi numrin e të vdekurve në më shumë se 61,700, duke thënë se mijëra njerëz të zhdukur nën rrënoja supozohet të jenë të vdekur.
Rreth 1,139 persona u vranë në Izrael gjatë sulmeve të udhëhequra nga Hamasi më 7 tetor 2023, dhe më shumë se 200 të tjerë u morën robër.
Marrë nga A2CNN
