Bitcoin ka arritur një rekord të ri historik, duke kaluar për herë të parë kufirin prej 110,000 dollarësh amerikanë, sipas të dhënave nga platforma e tregtimit Binance, shkruan Skyweb.al.
Rreth orës 23:27 GMT të së martës, çmimi i kriptomonedhës më të madhe në botë arriti vlerën 111,000 dollarë, me një rritje të përditshme prej 3.65%. Pas disa minutash, çmimi pësoi një korrigjim të lehtë dhe ra në 109,600 dollarë, duke ruajtur një rritje të përgjithshme ditore prej 2.59%.
Sipas analistëve të Bloomberg, rritja e ndjeshme e çmimit të Bitcoin është nxitur nga interesi në rritje i investitorëve institucionalë, si dhe pritshmëritë për rregullore më të qarta dhe pozitive për kriptovalutat në Shtetet e Bashkuara. Propozimi i ligjit të ri për stablecoin-et, i njohur si “Genius Act”, po shihet si një hap i rëndësishëm drejt formalizimit të industrisë së kriptomonedhave.
Ekspertët e tregut shprehen se Bitcoin mund të arrijë deri në 300,000 dollarë në një periudhë afatmesme, nëse vazhdojnë prirjet aktuale të adoptimit dhe stabilitetit në tregjet financiare globale. Investitorët po e konsiderojnë Bitcoin-in si një “strehë” kundër inflacionit dhe pasigurive ekonomike.
Bitcoin, i hedhur në treg në vitin 2008 nga një person anonim nën emrin Satoshi Nakamoto, është një monedhë dixhitale e decentralizuar që funksionon pa ndërmjetës si bankat qendrore.
Transaksionet regjistrohen në një sistem publik të quajtur blockchain.
Rritja aktuale konsiderohet si një nga valët më të forta të Bitcoin-it, në një periudhë ku tregjet tradicionale po përballen me pasiguri, norma të larta interesi dhe tensione ekonomike në rritje.
Marrë nga Skyweb.al
