Një javë luftime të përgjakshme mes beduinëve sunitë dhe pakicës druze, rezulton të kenë marrë 1 mijë e 120 jetë njerëzish në provincën jugore të Sweida në Sirinë jugore.
Banorët e qytetit Sweida, të cilët numërojnë rreth 150,000, janë mbyllur në shtëpitë e tyre pa energji elektrike dhe ujë, dhe furnizimet me ushqim kanë qenë gjithashtu të pakta.
Trupat qeveritare siriane u tërhoqën nga jugu i Sirisë pas sulmeve izraelite, por edhe ndërhyrjes së Shteteve të Bashkuara që thanë se kishin negociuar një armëpushim midis qeverisë së Sirisë dhe Izraelit. Izraeli, i cili ka komunitetin e vet druz, ka thënë se po vepronte në mbrojtje të grupit, si dhe për të zbatuar kërkesat e tij për demilitarizimin total të jugut të Sirisë.
I dërguari special i SHBA-së në Siri, Tom Barrack, tha të dielën se vendi ndodhet në një “udhëkryq kritik”, duke shtuar se “paqja dhe dialogu duhet të mbizotërojnë – dhe të mbizotërojnë tani”. Por pyetja më e shpeshtë e të gjithëve është pse ndodhi pikërisht tani ky përshkallëzim brenda Sirisë dhe pse ndërhyri Izraeli menjëherë.
Ekspertët thonë se zyrtarisht, të dyja vendet kanë qenë në luftë që nga viti 1967 kur Izraeli pushtoi Lartësitë e Golanit sirian, një pllajë me rëndësi strategjike në kufirin midis dy vendeve.
Në vitin 1981, Izraeli de facto aneksoi territorin, por bashkësia ndërkombëtare ende e konsideron atë territor sirian nën pushtimin ushtarak izraelit.
“Izraeli po përpiqet të krijojë një zonë tampon informale në Sirinë jugore”, tha këtë javë për Bloomberg Ryan Bohl, analist i Lindjes së Mesme.
Marrë nga AFP
