Përplasja virtuale mes Kryeministrit Edi Rama dhe liderit të partisë britanike Reform UK, Nigel Farage ka nisur prej disa kohësh dhe po vijon me deklarata të reja nga të dyja palët.
Së fundmi, Farage ka deklaruar se është në bisedime me Edi Ramën për një marrëveshje që parashikon kthimin në Shqipëri të të gjithë të burgosurve shqiptarë që ndodhen në burgjet britanike.
Ai ka dalë në një konferencë për shtyp ku ndër të tjera tha se kryeministri shqiptar ka rënë dakord me këtë propozim, duke e cilësuar si një zhvillim pozitiv.
Këto deklarata vijnë pas akuzave të mëparshme që Farage i bëri Ramës, duke e cilësuar hipokrit për komentet e tij mbi Britaninë pas Brexit-it. Farage kishte thënë se një në 50 shqiptarë që ndodhen në Britani është në burg, ndërsa Rama e kundërshtoi këtë shifër, duke thënë se raporti real është 1 në 100.
Përplasja ka vijuar edhe në rrjetin social X, ku Farage i kërkoi publikisht Ramës që të marrë mbrapsht kriminelët shqiptarë. Rama iu përgjigj duke e ftuar si mik nderi në Shqipëri, ftesë të cilën Farage e pranoi.
Ndërkohë, Farage prezantoi edhe politikat e tij për drejtësinë penale, duke thënë se do të shpenzonte 17.4 miliardë paund për to, fonde që do të vinin nga anulimi i projektit HS2 dhe heqja dorë nga objektivat për neutralitet klimatik.
Marrë nga Newsbomb.al
