Presidenti Donald Trump ka autorizuar fshehurazi përdorimin e forcës ushtarake kundër karteleve të drogës në Amerikën Latine, të cilat janë shpallur nga Shtetet e Bashkuara si organizata terroriste të huaja, sipas disa raportimeve.
Ky veprim, i raportuar nga ‘New York Times’, do t’u jepte forcave amerikane leje për të ndërhyrë kundër karteleve, të cilat trafikojnë drogëra si fentanili përtej kufirit SHBA-Meksikë.
“Presidenti është i vendosur jo vetëm t’i çmontojë – por t’i shkatërrojë plotësisht – kartelin e Los Soles të [diktatorit venezuelian Nicolás] Maduro dhe të zhdukë operacionet e tyre në Hemisferën Perëndimore,” tha një burim pranë Shtëpisë së Bardhë, sipas ‘New York Post’.
Përpjekja kundër karteleve po koordinohet mes disa departamenteve, përfshirë Departamentin e Mbrojtjes, Departamentin e Drejtësisë, Departamentin e Sigurisë Kombëtare, Zyrën e Drejtorit të Inteligjencës Kombëtare dhe Thesarin, shtoi burimi.
“Prioriteti kryesor i presidentit Trump është mbrojtja e atdheut, prandaj ai mori hapin e guximshëm për të shpallur disa kartele dhe banda si organizata terroriste të huaja,” tha zëvendëssekretarja për shtyp e Shtëpisë së Bardhë, Anna Kelly, në një deklaratë për Fox News Digital.
Presidentja e Meksikës, Claudia Sheinbaum, të premten deklaroi se ushtria amerikane nuk do të hyjë në territorin meksikan, pas raportimeve se Uashingtoni mund të ndërmarrë veprime për të luftuar kartelet.
“Kjo nuk ka të bëjë fare me territorin meksikan,” tha ajo. “Ka të bëjë me vendin e tyre. Nuk përfshin territorin tonë.”
Trump ka folur më parë për përdorimin e forcës ushtarake kundër karteleve të drogës, si përpjekje për të ndalur rrjedhën e drogës dhe emigrantëve të paligjshëm përtej kufirit jugor. Ai gjithashtu ka vendosur sanksione ndaj anëtarëve të lartë të kartelit Del Noreste, një nga organizatat më të dhunshme të trafikut të drogës në Meksikë dhe një organizatë e shpallur terroriste nga SHBA.
Së fundmi, ai ka përdorur kërcënimin me tarifa doganore për të detyruar Meksikën dhe Kanadanë të marrin pjesë aktive në përpjekjet kundër trafikut.
Në lidhje me kartelet e Amerikës Latine, administrata ka vënë në shënjestër edhe presidentin venezuelian Nicolás Maduro, i cili është i kërkuar nga SHBA. Të enjten, Prokurorja e Përgjithshme Pam Bondi shpalli një shpërblim prej 50 milionë dollarësh për informacione që çojnë në arrestimin e tij.
“Maduro përdor organizata terroriste të huaja si TdA (Tren de Aragua), Sinaloa dhe Kartelin e Diellit (Cartel de los Soles) për të sjellë dhunë vdekjeprurëse në vendin tonë,” tha Pam Bondi në një mesazh video. “Ai është një nga trafikantët më të mëdhenj të drogës në botë dhe një kërcënim për sigurinë tonë kombëtare.”
Disa javë pas marrjes së detyrës, Shtëpia e Bardhë shpalli ekstradimin e 29 anëtarëve të karteleve të ndryshme të drogës meksikane.
“Administrata e mëparshme i lejoi këta kriminelë të qarkullonin lirshëm dhe të kryenin krime në mbarë botën. Administrata Trump po i shpall këta banditë si terroristë – sepse kjo është ajo që janë – dhe po kërkon drejtësi për popullin amerikan,” thuhej në deklaratën e Shtëpisë së Bardhë në atë kohë.
Marrë nga Fox News
