Fund i hidhur për Egnatian në turin e tretë të Conference League. Skuadra e Edlir Tetovës, pas një 0-0 në ndeshjen e parë në Slloveni, nuk ia doli të siguronte kualifikimin në shtëpi, duke u mposhtur 4-2 pas shtesave nga Olimpija Ljubljana.
Rrogozhinasit nisën ndeshjen furishëm, duke shënuar katër herë në vetëm tetë minutat e para, por tre gola u anuluan. Vetëm rrjeta e Lushkjes në minutën e 6-të u konsiderua e rregullt, duke i dhënë avantazhin vendasve. Pavarësisht kontrollit të lojës, një goditje këndi në minutën e 32-të u shfrytëzua nga sllovenët për të barazuar shifrat.
Në pjesën e dytë, miqtë kaluan për herë të parë në avantazh në minutën e 79-të, dhe situata u vështirësua edhe më shumë për Egnatian pas daljes me karton të kuq të Jahajës. Megjithatë, Lushkja u shfaq sërish vendimtar në minutën e 86-të, duke barazuar në 2-2 dhe duke çuar sfidën në shtesa.
Aty, dy lojtarë nga stoli të Olimpijas, Durdov dhe Blanko, realizuan në secilën pjesë shtesë, duke vulosur fitoren 4-2 dhe eliminimin e Egnatias nga ky edicion europian. Pavarësisht rezultatit, rrogozhinasit lanë pas një paraqitje të guximshme, duke treguar se mund të rivalizojnë edhe kundër skuadrave me përvojë ndërkombëtare.
Marrë nga Syri.net
