Tre oficerë u vranë dhe dy të tjerë mbeten në gjendje kritike, por të qëndrueshme, pas të shtënave të ndodhura të mërkurën pasdite në një zonë rurale të Pensilvanisë qendrore, tha zyrtari i Policisë Shtetërore të Pensilvanisë, Kolonel Christopher Paris.
Ngjarja duket se ka ndodhur ndërsa oficerët po ekzekutonin një urdhër gjykate, tha për CNN një burim i njohur me situatën.
Policia u dërgua në Haar Road në Spring Grove, një lagje kryesisht bujqësore e qarkut York, e mbushur me hambarë të vegjël dhe toka të mëdha bujqësore.
Një helikopter mjekësor u pa në një nga fushat me bar të zonës, i rrethuar nga rruga e lakuar e ndriçuar nga dritat vezulluese të disa makinave zjarrfikëse, makinave të policisë dhe ambulancave.
Zyrtarët shtetërorë dhe të qarkut nuk kanë dhënë ende informacion shtesë për mënyrën se si ndodhi incidenti.
Kryemjekja ligjore e qarkut York, Pamela Gay, i tha më herët CNN-it se zyra e saj ka reaguar ndaj incidentit, por refuzoi të jepte detaje.
FBI-ja së bashku me agjentë nga Departamenti i Alkoolit, Duhanit, Armëve të Zjarrit dhe Eksplozivëve ndodhen në vendngjarje duke mbështetur autoritetet lokale, tha Prokurorja e Përgjithshme e SHBA-ve, Pam Bondi, në një postim në X.
“Dhuna kundër zbatuesve të ligjit është një plagë për shoqërinë tonë dhe kurrë e papranueshme. Lutuni për oficerët e përfshirë,” shtoi Bondi.
Marrë nga CNN
