Aleksandër Vuçiç, presidenti i Serbisë, ka thënë ditën e sotme se “të gjithë po përgatiten për luftë” dhe se Kosova po “përpiqet ta përdorë këtë kohë para luftës” për t’i bindur shumicën e shteteve evropiane dhe vendet e NATO-s t’ia mbajnë anën Prishtinës.
Vuçiç i bëri këto deklarata pasi u pyet nga një gazetar, mbi atë çka kishte thënë presidentja e Kosovës, Vjosa Osmani, e cila i kërkoi Europës që të parandalojë taktikat agresive dhe destabilizuese të Serbisë ndaj fqinjëve të saj.
Gjatë Samitit të Komunitetit Politik Evropian (EPC) në Kopenhagë, presidenti Vuçiç është shprehur se “bota do të bëhet gjithnjë e më e vështirë dhe po shkojmë drejt një konflikti të madh”.
“E dimë tashmë se do të ketë luftë, dhe do të ketë, po jua them unë, sepse e shoh çfarë po ndodh dhe si po përgatiten të gjithë. Askush nuk po përgatitet për bisedimet, ata thjesht po shikojnë se kush do të jetë në anën e kujt. Ata po gërmojnë llogoret e tyre dhe po e presin fillimin”, tha Vuçiç.
Pavarësisht deklaratës, ai nuk dha asnjë provë për të mbështetur pretendimet për luftë, sipas REV. Por shtoi se Serbia do të bëjë çmos për të mos qenë pjesë e asaj lufte që sipas tij do të krijohet.
Marrë nga Newsbomb.al
