Policia ka zbuluar një rast të evazionit fiskal dhe përdorimit të produkteve të skaduara në një klinikë dentare në zonën e “Don Boskos” në Tiranë. Gjatë kontrollit të ushtruar, janë sekuestruar rreth 300 shishe me produkte dentare, shumica e të cilave të skaduara dhe pa fatura zhdoganimi, me një vlerë të përllogaritur rreth 100 mijë euro.
Në klinikë janë gjetur gjithashtu mandate pagesash të pafiskalizuara, çka ngre dyshime për shmangie të detyrimeve tatimore në shuma të konsiderueshme. Si rezultat i operacionit, është arrestuar administratori i klinikës, një shtetas turk, ndërsa janë vënë nën hetim koordinatorja e subjektit dhe dy laborantë, të cilët dyshohet se kanë qenë në dijeni të veprimtarisë së paligjshme.
NJOFTIMI:
Seksioni për Hetimin e Pastrimit të Parave dhe Aseteve Kriminale finalizon operacionin policor të koduar “Dentistry”. Zbulohet se në një klinikë dentare në “Don Bosko”, kryhej evazion fiskal dhe shërbehej me produkte të skaduara.
Sekuestrohen 300 shishe me produkte (shumica, të skaduara), pa fatura zhdoganimi, me vlerë rreth 100 000 euro, si dhe mandate të pafiskalizuara. Arrestohet administratori i klinikës (shtetas turk).
Vihen në hetim koordinatorja e subjektit dhe 2 laborantë. Si rezultat i administrimit të shpejtë të informacioneve të siguruara në rrugë operative, se në një subjekt (klinikë stomatologjike) në zonën “Don Bosko”, kryheshin krime ekonomike dhe krime kundër shëndetit/jetës, specialistët e Seksionit për Hetimin e Pastrimit të Parave dhe Aseteve Kriminale finalizuan operacionin “Dentistry”.
Gjatë ndërhyrjes në ambientet e klinikës, u kap dhe u arrestua administratori i subjektit, shtetasi turk, A. Y., 59 vjeç.
Gjithashtu, u kapën në flagrancë, 3 punonjës të klinikës, konkretisht koordinatorja, shtetasja B. K., 35 vjeçe, si dhe 2 laborantët, shtetasit L. S., 21 vjeçe dhe A. A., 42 vjeç, për të cilët nisi procedimi në gjendje të lirë.
Nga kontrolli në ambientet e klinikës u gjetën dhe u sekuestruan me cilësinë e provës materiale, 300 shishe me produkte (shumica, të skaduara), me vlerë rreth 100 000 euro, për të cilat nuk disponoheshin fatura zhdoganimi, si dhe mandate të pafiskalizuara. Vijojnë hetimet për të përcaktuar dëmin ekonomik që i është caktuar shtetit, si pasojë e shmangies së detyrimeve tatimore nga ky subjekt. Materialet procedurale iu referuan Prokurorisë së Tiranës, për veprime të mëtejshme.
Marrë nga Dosja.al
