Një nga shtyllat e Paketës Fiskale 2026 është ulja e përdorimit të parasë cash, teksa projektligji parashikon 4 masa që parashikohet të sjellin transaksione më të gjurmueshmë, të sigurta dhe të formalizuara.
“Bizneset do të lejohen të kryejnë me njëri- tjetrin pagesa cash deri në shumën 100,000 lekë. Mbi këtë shumë, çdo pagesë do të duhet të bëhet përmes bankës. Bizneset do të lejohen të shesin për konsumatorët, mallra dhe shërbime me para në dorë, deri në shumën e 500,000 lekëve. Mbi këtë shumë, çdo shitje do të duhet të realizohet sërish nëpërmjet transaksioneve bankare apo në formë elektronike. Vitin e ardhshëm, brenda datës 30 Maj 2026, çdo biznes që operon në sektorin e turizmit edhe në atë të transportit, përveç pagesave cash, do të duhet të garantojë forma alternative të pagesave elektronike, ku përfshihen pajisjet POS, apo forma të tjera elektronike. Ndërkohë ky detyrin duhet të përmbushet nga të gjithë bizneset e tjera, brenda datës 31/12/2026”, – tha ministri i Financave, Petrit Malaj.
Një tjetër reformë është ajo e rivlerësimit të pasurive të paluajtshme me normë të reduktuar tatimore, 5% dhe e përcaktimit të metodologjisë për çmimeve të reja të referencës për të gjithë territorin e vendit, përjashtuar këtu Tiranën.
“Jo pa qëllim, Ministria e Financave gjykoi që këto dy nisma të prezantoheshin paralelisht, në mënyrë që të gjithë qytetarët shqiptarë të kishin mundësi të përfitonin nga rivlerësimi i pasurive të paluajtshme, duke i përafruar ato me vlerat e tregut, por nga ana tjetër do të kenë mundësinë ta kryejnë këtë rivlerësim me një normë më të reduktuar tatimore në masën 5% nga 15% që është aktualisht” – u shpreh Malaj.
Ndërkaq, me përcaktimin e metodologjisë pritet të publikohen dhe çmimet e reja të referencës për të gjithë qytetet, që sipas ministrit do të jetëgati shumë shpejt.
Marrë nga Scantv.al
