Gjykata e Posaçme kundër Korrupsionit dhe Krimit të Organizuar (GJKKO) ka pezulluar nga posti zëvendëskryeministren Belinda Balluku dhe i ndalon asaj daljen jashtë vendit, duke pranuar kështu kërkesën e SPAK në kuadër të dy hetimeve të mëdha për prokurime publike.
Vendimi i marrë të mërkurën (19.11.2025) lidhet me procedurat e tenderimit për tunelin e Llogarasë dhe për lotin e katërt të Unazës së Madhe të Tiranës, dy projekte që llogariten ndër investimet më të mëdha infrastrukturore të qeverisë së kryeministrit Edi Rama. GJKKO nuk publikoi detaje të mëtejshme, duke theksuar për mediat, se masat e sigurimit “kanë karakter sekret”.
“Në momentin e duhur procedurial do të njoftoheni zyrtarisht nga ana e gjykatës” – thuhet në njoftimin e institucionit.
Akuzat e SPAK për Ballukun
Zëvendëskryeministrja dhe ministrja e Infrastrukturës, Belinda Balluku, u mor zyrtarisht e pandehur nga SPAK më 31 tetor 2025, nën akuzën për shkelje të barazisë në tendera. Hetimi ka në qendër procedurën për ndërtimin e tunelit të Llogarasë, në seksionin rrugor Orikum-Himarë, një projekt prej rreth 190 milionë eurosh.
Sipas Prokurorisë së Posaçme, Balluku dyshohet se ka ushtruar ndikimin e saj si ministre në paracaktimin e fituesit të tenderit, duke cënuar kriteret e konkurrencës së drejtë. Dyshimet u ngritën pasi hetuesit analizuan komunikimet e sekuestruara të ish-drejtorit të Autoritetit Rrugor Shqiptar, Evis Berberi, i cili tashmë është dërguar për gjykim për të njëjtën çështje.
Balluku nga Kuvendi: “Akuza publike të pabaza”
Nga foltorja e Kuvendit, ku qeveria prezantonte projektbuxhetin për vitin 2026, Belinda Balluku reagoi për herë të parë mbi komentet publike ndaj saj duke i cilësuar si të “pabazuara”. “Nuk do dëgjoni kurrë nga unë akuza dhe sharje për drejtësinë e re, as kur prekem personalisht. Nuk do prononcohem për çështje nën hetim. Derisa e vërteta të marrë formë të prerë, cilado qoftë ajo” – u shpreh Balluku.
Ajo akuzoi opozitën, se po mban “standarde të dyfishta” në raport me SPAK-un dhe reformën në drejtësi, ndërsa deputetët opozitarë braktisën sallën në momentin që ajo mori fjalën.
Kryeministri Edi Rama e interpretoi sjelljen e opozitës si presion ndaj institucioneve të drejtësisë. “Po bëni prokurorinë popullore…”, u tha ai deputetëve që kërkuan dorëheqjen e Ballukut.
Belinda Balluku është pjesë e qeverisë “Rama” që prej vitit 2019, në postin e ministres së Infrastrukturës dhe Energjisë, duke drejtuar për më shumë se pesë vjet një nga portofolët më të mëdhenj të kabinetit. Ajo është zëvendëskryeministrja e dytë e qeverisjes socialiste që merret e pandehur nga SPAK, pas ish-zv.kryeministrit Arben Ahmetaj.
Marrë nga Deutsche Welle
