Pothuajse gjysma e evropianëve e shohin Donald Trumpin si “armik të Evropës”, më shumë se gjysma e vlerësojnë rrezikun e luftës me Rusinë si të lartë dhe më shumë se dy të tretat besojnë se vendi i tyre nuk do të jetë në gjendje të mbrohet në rast të një lufte të tillë, thotë një hulumtim i realizuar së fundmi.
Sondazhi i nëntë vendeve për platformën e debatit për çështjet evropiane me seli në Paris, Le Grand Continent, zbuloi gjithashtu se pothuajse tre të katërtat e të anketuarve dëshironin që vendi i tyre të qëndronte në BE, me pothuajse po aq shumë që thanë se largimi nga unioni kishte dëmtuar Mbretërinë e Bashkuar.
Jean-Yves Dormagen, një profesor i shkencave politike dhe themelues i agjencisë së sondazheve Cluster17, ka thënë se Evropa jo vetëm që po përballet me rreziqe në rritje, por po kalon edhe një transformim të mjedisit të saj historik, gjeopolitik dhe politik.
“Pamja e përgjithshme (e sondazhit) portretizon një Evropë që është në ankth, që është thellësisht e vetëdijshme për dobësitë e saj dhe që po përpiqet të projektojë veten pozitivisht në të ardhmen”, ka deklaruar ai.
Sondazhi zbuloi se mesatarisht 48% e njerëzve në nëntë vendet e shohin Trumpin si një armik të hapur – duke filluar nga nivelet më të larta prej 62% në Belgjikë dhe 57% në Francë deri në nivelet më të ulëta prej 37% në Kroaci dhe 19% në Poloni.
“Në të gjithë kontinentin, Trumpizmi konsiderohet qartë një forcë armiqësore”, ka thënë Dormagen, duke shtuar se ky perceptim po ngurtësohej, me më pak njerëz sesa në dhjetor 2024 që e përshkruanin Trumpin si “as mik as armik” dhe më shumë si padyshim armiqësor.
Megjithatë, evropianët ende e shohin marrëdhënien me SHBA-në si të rëndësishme strategjikisht: kur u pyetën se çfarë qëndrimi duhet të mbajë BE-ja ndaj qeverisë amerikane, opsioni më i popullarizuar (48%) ishte kompromisi.
Sondazhi në Francë, Itali, Spanjë, Gjermani, Poloni, Portugali, Kroaci, Belgjikë dhe Holandë zbuloi gjithashtu se një shumicë relative (51%) mendonte se rreziku i një lufte të hapur me Rusinë në vitet e ardhshme ishte i lartë, dhe 18% e konsideronin atë shumë të lartë.
Pikëpamja ndryshonte shumë në varësi të afërsisë me Rusinë, me 77% të të anketuarve në Poloni që e konsideronin rrezikun e luftës të lartë, krahasuar me 54% në Francë, 51% në Gjermani, 39% në Portugali dhe 34% në Itali.
Besimi në aftësitë ushtarake kombëtare ishte i ulët kudo, zbuloi anketa, me 69% të të anketuarve në nëntë vendet që thanë se mendonin se vendi i tyre nuk ishte “vërtet” ose “aspak” i aftë të mbrohej kundër agresionit rus.
Të anketuarit francezë ishin më të sigurt, por ky mbeti një mendim minoritar në 44%. Në Poloni, e cila kufizohet me Rusinë, 58% nuk ishin.
Marrë nga Daily Mail
