Policia Rrugore e Elbasanit ka njoftuar bllokimin e përkohshëm të qarkullimit në aksin rrugor Librazhd Korçë, për shkak të punimeve që do të kryhen në zonën e fshatit Dragostunjë.
Sipas njoftimit zyrtar, bllokimi do të zbatohet nga data 3 shkurt 2026 deri më 5 shkurt 2026, në intervalin kohor nga ora 22:00 deri në orën 05:00. Gjatë këtij orari, aksi do të jetë i pakalueshëm për të gjitha mjetet, me fokus të veçantë për automjetet e tonazhit të rëndë.
Autoritetet bëjnë me dije se për këtë situatë janë informuar edhe pikat e kalimit kufitar, me qëllim njoftimin paraprak të drejtuesve të mjeteve që lëvizin në këtë drejtim.
Gjatë kohës së bllokimit do të lejohen të qarkullojnë vetëm autoambulancat, mjetet zjarrfikëse dhe automjetet e Policisë.
Si rrugë alternative për mjetet e vogla, Policia Rrugore njofton se do të shërbejë aksi Maliq-Lozhan-Moglicë-Gramsh, në drejtim të Tiranës dhe anasjelltas.
Kujtojmë se vetëm dy ditë më parë, në zonën e Dragostunjës, një shembje masive gurësh dhe dherash bllokoi për disa orë qarkullimin në këtë aks, duke krijuar vështirësi të mëdha për lëvizjen e automjeteve.
Marrë nga Skyweb.al
