Investimet e huaja direkte në Kosovë shënuan një nivel rekord në vitin 2025, duke arritur në 1.03 miliard euro. Brenda këtij fluksi të përgjithshëm kapitali, Shqipëria renditet ndër investitorët më të rëndësishëm.
Në renditjen e shteteve sipas vlerës së investimeve gjatë vitit 2025, Gjermania mban vendin e parë me 268.7 milionë euro investime në Kosovë. Pas saj renditet Zvicra me 223.9 milionë euro, ndërsa Shqipëria zë vendin e tretë me 103.6 milionë euro investime. Kjo e pozicionon Shqipërinë përpara disa ekonomive të mëdha që tradicionalisht kanë qenë investitorë të rëndësishëm në Kosovë.
Në raport me totalin e investimeve të huaja direkte në Kosovë gjatë vitit 2025, investimet nga Shqipëria përbëjnë rreth 10% të totalit, një peshë dukshëm më e madhe krahasuar me vitet e mëhershme. Kjo tregon një rritje të rolit të kapitalit shqiptar në ekonominë e Kosovës dhe një intensifikim të lidhjeve ekonomike mes dy vendeve.
Nëse krahasohet me periudhat më të hershme, rritja është edhe më e dukshme. Në vitin 2007, investimet shqiptare në Kosovë ishin vetëm 3.4 milionë euro, ndërsa në 2008 u rritën në 21.9 milionë euro dhe në 2009 në 23.3 milionë euro. Në vitet pasuese investimet luhateshin kryesisht midis 10 dhe 20 milionë eurove, si në vitin 2010 me 20.3 milionë euro dhe në 2011 me 11.2 milionë euro.
Një rritje më e ndjeshme filloi të shfaqet në mesin e dekadës së kaluar. Në vitin 2015, investimet shqiptare arritën në 40.1 milionë euro, ndërsa në 2016 u regjistruan 28.6 milionë euro. Megjithatë, në 2017 pati një rënie të theksuar në 2.4 milionë euro, duke qenë një nga nivelet më të ulëta të investimeve shqiptare në Kosovë gjatë periudhës së analizuar.
Pas vitit 2020 trendi i investimeve shqiptare ndryshon ndjeshëm në kahun rritës. Në 2020 investimet arritën në 39.8 milionë euro, ndërsa në 2021 u rritën në 50.4 milionë euro. Rritja vazhdoi edhe në vitet pasuese, me 47.3 milionë euro në 2022, 64.5 milionë euro në 2023 dhe 89 milionë euro në 2024.
Kulmi i këtij trendi arrihet në 2025, kur investimet e Shqipërisë në Kosovë arrijnë në 103.6 milionë euro, niveli më i lartë i regjistruar ndonjëherë.
Marrë nga Ekofin.al
