Champions/ PSG mund me dominim Liverpool-in

Përditësimi i fundit: 9 Prill, 2026 10:20 am

167 Shikime

2 Min. Leximi

PSG është në një tjetër nivel, dhuron spektakël në Champions, “çmonton” Liverpool duke i shndërruar të kuqtë në një ekip të vogël, në një kohë kur e dominuan aktin e parë në çdo aspekt, nuk i lejuan të godisnin asnjë herë kuadratin, por në fund rezultati 2-0 i rri ngushtë për aq sa prodhuan, 18 raste, goditën 6 herë kuadratin dhe shtyllën. Ekipi i Luis Enriques ishte i papërmbajtshëm në “Parkun e Princave” teksa morën kontrollin e lojës që nga minuta e parë.

Në të 11-ën, Doue me një goditje të fortë, gjeti dhe një devijim me lehtë duke bërë që topi të përfundonte në rrjetë. Ousmane Dembele ishte një nga protagonistët kryesor të këtij takimi, me “Topin e Artë” në fuqi që u shërbye në çdo formë, por në asnjë rast sulmuesi francez nuk ishte i saktë, duke shpërdoruar disa raste të pastra. Pas disa tentativave, Neves krijoi një korridor fantastik për Kvaratskhelia, me yllin gjeorgjian që shmangu këdo që i doli përpara duke realizuar një super gol në minutën e 65-të. Luis Enrique dhe i gjithë stoli i PSG shpërtheu në festë, të vetëdijshëm për peshën e këtij goli. Vendasit reklamuan edhe një penallti pak minuta më vonë, por pasi rishikoi pamjet në VAR gjyqtari i takimit anuloi gjithçka.

Liverpool ishte i pafuqishëm për të reaguar, ndërsa PSG ishte i pafat, si në minutën e 87-të, ku Dembele me një predhë të vërtetë brenda në zonë u ndal në shtyllën pingule. Rezultati mbeti i pandryshuar deri në fund, me PSG që feston për këtë sukses, duke hedhur një hap të sigurt drejt fazës gjysmëfinale të Champions League.

Marrë nga Balkanweb.com