Ish-presidenti Ilir Meta pas 18 muajsh në qeli u shfaq për herë të parë publikisht në seancën në themel në GJKKO. Pamja fizike e tij ishte transformuar, ku kreu i Partisë së Lirisë kishte rënë shumë në peshë. Përfaqësuesi i Komitetit Shqiptar të Helsinkit, Zylyftar Bregu, ka treguar në media disa detaje rreth jetës pas hekurave të ish-presidentit të Shqipërisë, të cilat mendohen se lidhen me gjendjen shëndetësore të tij.
Bregu u shpreh se gjenda fizike e Metës tregon mungesën e rrezeve të diellit të një njeriu që ka qëndruar më shumë se një vit në burg dhe kequshyerje. Përfaqësuesi i Komitetit Shqiptar të Helsinkit tregon se Meta qëndron i vetëm në qeli dhe refuzon të hajë ushqimin e komanduar. Ish-presidenti ka zgjedhur të hajë 7 ditë të javës atë ushqim që i vjen një herë në javë.
Zylyftar Bregu: Për shkak të një marrëveshjeje që kam me Komitetin Shqiptar të Helsinkit, nuk mund të zbardh shumë detaje. Disa gjëra, nisur edhe nga interesi i madh për shëndetin e tij, mund t’i them në një farë mënyre. Edhe unë u habita pak kur u ndesha me të për gjendjen e tij fizike. Gjatë bisedës me të, por edhe njohjes që kam, mund ta shpjegoj pak.
Ka të burgosur që e ndajnë qelinë bashkë. Këta njerëz që e quajnë njëri-tjetrin shok buke, bëjnë një kalendar që familjet t’i sjellin ushqimet në ditë të caktuara të javës, që të gjithë ata të hanë ushqim të freskët. Z. Meta qëndron i vetëm në qeli dhe autoritetet e burgut zgjedhin të bëjnë një sjellje pak strikte, duke e lejuar familjen që t’i sjellin ushqimin e freskët vetëm një herë në javë. Z. Meta refuzon të hajë atë që quhet ‘ushqimi i komandës’, ai zgjedh të hajë 7 ditë të javës atë ushqim që i vjen një herë në javë. Ka kufizim kilogram për ushqimin, por struktura nuk e njeh këtë kufizim, vetëm kur duan ta respektojnë rigorozisht rregulloren.
Z. Meta u ankua që nuk bënte kohën e duhur të ajrimit. Ajo gjendje tregon edhe mungesën e rrezeve të diellit të një njeriu që ka 1.5 vite në paraburgim. Dilte vetëm një herë në ditë dhe nuk e bënte kohën e nevojshme prej dy orësh, siç është në pretendimin e tij. Jetonte i vetëm në një qeli, edhe për shkak të një plani masash të posaçme që drejtoria e përgjithshme e burgjeve ka bërë për sigurinë e tij.
Marrë nga Top Channel
