Prokuroria pranë Gjykatës së Shkallës së Parë të Juridiksionit të Përgjithshëm Shkodër ka përfunduar hetimet dhe ka dërguar për gjykim katër shtetas, të akuzuar për pastrim të produkteve të veprës penale me pasoja të rënda.
Të pandehurit janë Arsuel Curaj, Alma Guraj, Gezim Guraj dhe Vladimir Jacaj.
Sipas hetimeve të kryera në kuadër të procedimit penal nr. 1280 të vitit 2021, rezulton se këta shtetas, në bashkëpunim me njëri-tjetrin, kanë realizuar një sërë veprimesh të dyshuara si fiktive, përfshirë kontrata shkëmbimi pronash, dhurime, shitje, si dhe transaksione bankare.
Dyshohet se përmes këtyre veprimeve është synuar pastrimi i produkteve të një veprimtarie kriminale në vlerën e rreth 500 mijë eurove.
Prokuroria bën me dije se kjo shumë është sekuestruar, ndërsa çështja tashmë i kalon për shqyrtim gjykatës.
Marrë nga Droni.al
