Eliminimi i Bayern-it ndaj Paris Saint-Germain në UEFA Champions League u shoqërua edhe me polemika të forta për arbitrimin e portugezit João Pinheiro.
Lojtarët dhe stafi i skuadrës bavareze protestuan ashpër për dy episode të diskutueshme në pjesën e parë të takimit të zhvilluar në ‘Allianz Arena’.
Momenti i parë ndodhi në minutën e 29-të, kur mbrojtësi i PSG-së, Nuno Mendes, i cili ishte ndëshkuar më herët me karton të verdhë, preku topin me dorë gjatë një aksioni sulmues të Bayernit. Megjithatë, arbitri Pinheiro ndaloi lojën për një prekje të mëparshme me dorë të Konrad Laimer dhe akordoi goditje dënimi për francezët, vendim që shkaktoi reagime të menjëhershme nga vendasit.
Vetëm pak minuta më vonë erdhi edhe episodi tjetër i debatueshëm. Mesfushori Vitinha largoi topin nga zona, ndërsa ai u përplas më pas në krahun e majtë të shokut të tij të skuadrës, João Neves, i cili e kishte dorën të hapur, me sa duket në tentativë për të mbrojtur fytyrën.
Pavarësisht protestave të futbollistëve të Bayernit, arbitri lejoi vazhdimin e lojës dhe nuk akordoi penallti. Edhe sistemi VAR, ku ndodhej italiani Marco Di Bello, nuk ndërhyri për të ndryshuar vendimin.
Marrë nga SuperSport.al
