Kategoria Superiore ka dhënë verdiktet përfundimtare të fazës së rregullt, pasi u mbyll edhe raundi i 36-të dhe i fundit i kampionatit.
Bylisi do të ndjekë Flamurtari në Kategorinë e Parë, ndërsa Teuta do të luajë ndeshjen play-out me skuadrën që do të dalë e treta në Kategorinë e Parë.
Skuadra ballshiote kishte nevojë vetëm për një barazim në transfertë ndaj Vora për të shmangur rënien e drejtpërdrejtë, por u mposht thellë 5-2 nga skuadra vorake, e cila me këtë sukses siguron qëndrimin në Superiore.
Fitorja e Teutës 3-2 përballë Egnatia nuk i mjaftoi skuadrës durrsake për të shmangur play-out-in, pasi Vora ka avantazhin në ndeshjet direkte.
Mbijetesën e siguroi pa qenë nevoja të luajë në play-out edhe Tirana, e cila triumfoi 3-1 në “Elbasan Arena” ndaj vendasve në një ndeshje kaotike, e karakterizuar nga përplasjet mes tifozërive dhe ndërprerje të shkurtra, përfshirë edhe një moment tensioni me gjyqtarin Xhaja, i cili u largua për disa minuta në dhomat e zhveshjes.
Vllaznia siguroi vendin e parë me vetëm një pikë më shumë se Elbasani, pasi fitoi 2-0 ndaj Flamurtarit.
Ndërkohë, derbi i kryeqytetit mes Partizani dhe Dinamo City, i cili kishte vetëm vlerë statistikore, u mbyll me fitoren 2-1 të “demave”. Dinamo kishte siguruar më herët pjesëmarrjen në “Final Four”.
Marrë nga Syri.net
