Shkolla private “Kryqi i Nderuar” në Gjirokastër do të mbyllet me vendim të qeverisë, ndërsa nxënësit do të transferohen në institucione të tjera arsimore.
Vendimi është miratuar nga Këshilli i Ministrave dhe mban firmën e kryeministrit Edi Rama. Në VKM përcaktohet ndërprerja e aktivitetit të institucionit arsimor parauniversitar privat të arsimit të mesëm të lartë “Kryqi i Nderuar”, ku zhvilloheshin edhe lëndë fetare. Po ashtu, me të njëjtin vendim shfuqizohet edhe leja e funksionimit që shkolla kishte marrë në vitin 1999.
Sipas vendimit, institucioni ka detyrimin të pajisë nxënësit me të gjithë dokumentacionin e nevojshëm për transferimin në shkolla të tjera, si edhe të mbulojë shpenzimet që lidhen me këto procedura.
Gjithashtu, shkolla duhet të kthejë pagesat e kryera nga prindërit për pjesën e papërfunduar të vitit shkollor, në rastet kur ka detyrime të pambyllura.
Institucionet vendore të arsimit do të marrin masat për sistemimin dhe transferimin e nxënësve, ndërsa dokumentacioni i shkollës do të dorëzohet në arkivat shtetërore, në përputhje me procedurat ligjore.
Për zbatimin e këtij vendimi janë ngarkuar Ministria e Arsimit, Agjencia Kombëtare e Arsimit Parauniversitar, Zyra Vendore e Arsimit Parauniversitar Gjirokastër-Libohovë, si dhe Kisha Ortodokse Autoqefale e Shqipërisë.
Marrë nga Newsbomb.al
