Një delegacion nga Komisioni për Transport dhe Turizëm (TRAN) i Parlamentit Europian ka nisur një vizitë zyrtare në Shqipëri dhe Mal të Zi, e cila po zhvillohet nga data 26 deri më 28 tetor 2026.
Misioni i përbërë nga pesë eurodeputetë dhe i kryesuar nga Sophia Kircher, vjen në një moment kyç për rajonin, ku zhvillimi i pakontrolluar urban po kthehet në një nga shqetësimet kryesore të zyrtarëve europianë përpara prezantimit të Strategjisë së parë të BE-së për Turizmin e Qëndrueshëm në nëntor.
Fokusi i vizitës lidhet drejtpërdrejt me alarmet e ngritura mbi zhvillimin kaotik dhe ndërtimet pa plan në bregdetin shqiptar.
Ndërsa Shqipëria ka njohur një rritje të hovshme turistike, ky zgjerim i shpejtë pa një planifikim të integruar ka ekspozuar mangësi të theksuara strukturore që bien ndesh me parimet mjedisore të Bashkimit Europian.
Ndërhyrjet e parregullta në vijën bregdetare, të cilat ushtrojnë presion mbi infrastrukturën lokale, sistemet e ujësjellësit dhe menaxhimin e mbetjeve, janë pjesë e agjendës kryesore të inspektimit dhe diskutimeve të delegacionit.
Përtej vlerësimit të rrjeteve të transportit dhe ndërlidhjes rajonale, eurodeputetët do të shkëmbejnë pikëpamje me autoritetet vendase mbi nevojën emergjente për të balancuar flukset e larta të vizitorëve me mbrojtjen e mjedisit.
Sipas komitetit TRAN, synimi i strategjisë së re europiane është pikërisht shmangia e mbingarkesave dhe lehtësimi i presionit mbi destinacionet e mbingarkuara, duke siguruar që rritja e shpejtë e turizmit të mos dëmtojë qëndrueshmërinë afatgjatë të territorit.
“Misioni ynë vjen në një moment kyç,” u shpreh Kircher para vizitës.
“Transporti është çelësi për ta afruar Ballkanin Perëndimor me Bashkimin Evropian; lidhje më të mira dhe sisteme transporti më të integruara janë thelbësore për forcimin e partneriteteve tona me rajonin.”
Gjatë vizitës, deputetët evropianë do të takohen me partnerë vendas dhe rajonalë për të diskutuar mënyrat e përmirësimit të lidhjeve midis Ballkanit Perëndimor dhe BE-së. Ata gjithashtu do të shqyrtojnë mundësitë për thjeshtimin e procedurave të kalimit të kufirit, duke e bërë lëvizjen e njerëzve dhe mallrave më të lehtë dhe më efikase. Një temë tjetër kryesore do të jetë integrimi i rrjeteve rrugore, hekurudhore dhe të tjera të transportit të këtyre vendeve në sistemin më të gjerë europian.
“Gjatë vizitës sonë, ne do të shkëmbejmë pikëpamje me partnerët rajonalë mbi avancimin e infrastrukturës së transportit, përmirësimin e ndërlidhjes dhe adresimin e sfidave që lidhen me investimet e huaja nga vende të treta në rrjetet e transportit të rajonit,” tha Kircher.
Takimet do të përqendrohen gjithashtu në zhvillimin e turizmit të qëndrueshëm, rëndësinë e turizmit për ekonominë rajonale, si dhe ndikimin e numrit të vizitorëve sezonalë në infrastrukturën e transportit.
“Presim gjithashtu të diskutojmë mënyrat për të promovuar turizmin e qëndrueshëm dhe për të forcuar bashkëpunimin rajonal, veçanërisht tani që BE-ja po përgatit strategjinë e saj të re për turizmin e qëndrueshëm,” shtoi Kircher.
Ky fokus te qëndrueshmëria, ndërlidhja dhe komunitetet vendore pasqyron prioritetet e strategjisë së parë të BE-së për turizmin e qëndrueshëm, e cila pritet të prezantohet në nëntor të vitit 2026.
Strategjia synon të balancojë më efektivisht flukset turistike, të lehtësojë presionin mbi destinacionet e mbingarkuara dhe të shpërndajë përfitimet ekonomike të turizmit edhe në rajonet që vizitohen më rrallë.
Siç është theksuar nga komiteti TRAN, rreth 80% e udhëtarëve vizitojnë vetëm 10% të destinacioneve në mbarë botën, duke krijuar çekuilibra serioze dhe duke ushtruar presion mbi infrastrukturën lokale, strehimin dhe komunitetet.
Në vitet e fundit, Shqipëria është shfaqur si një nga historitë më të habitshme të suksesit në turizëm të Evropës, ashtu siç bëri Kroacia në dekadën e kaluar.
Dukshmëria ndërkombëtare e Shqipërisë mori një rritje të konsiderueshme kur u bë vendi zyrtar pritës i ITB Berlin 2025, duke ofruar një platformë të madhe ndërkombëtare për të shfaqur atraktivitetin e saj në rritje për turizmin.
Megjithatë, ky zgjerim i shpejtë ka ekspozuar edhe mangësi në infrastrukturën e saj të transportit, furnizimin me ujë dhe sistemet e menaxhimit të mbeturinave, ndërsa zhvillimi i parregulluar bregdetar ngre shqetësime mjedisore.
Ndërkohë, Mali i Zi ka qenë një destinacion i vendosur për një kohë më të gjatë, por popullariteti i tij ka ardhur me një çmim. Vendi i vogël Adriatik, veçanërisht qyteti i tij historik i Kotorrit, po lufton me mbiturizmin.
Mbërritjet e anijeve turistike kanë kontribuar në mbingarkesë dhe rritjen e kostove të strehimit, duke ushtruar presion mbi komunitetet lokale pasi numri i vizitorëve është rritur më shpejt sesa vendi ka qenë në gjendje të zgjerojë infrastrukturën e tij.
Të dy vendet ilustrojnë sfidat e balancimit të rritjes së turizmit me zhvillimin e infrastrukturës dhe qëndrueshmërinë, çështje qendrore për vizitën e delegacionit të BE-së, të cilat Kircher beson se mund të adresohen përmes një bashkëpunimi më të ngushtë.
“Jam e bindur se kjo vizitë do të ofrojë njohuri të vlefshme se si mund të ndërtojmë lidhje më të forta transporti, të thellojmë partneritetet tona dhe të zhbllokojmë potencialin e plotë të Malit të Zi dhe Shqipërisë, të cilat aktualisht po udhëheqin si pararendëse të qarta në procesin e zgjerimit”, përfundoi Kircher.
Marrë nga Kapitali.al
