Rreth orës 16.30 dje, mijëra studentë shqiptarë, të rinj dhe qytetarë në Maqedoninë e Veriut u ngritën në protestë për gjuhën shqipe.
Protesta e studentëve shqiptarë u shoqërua edhe me thirrje kombëtare. Po ashtu, gjatë marshimit të tyre, ata kanë kënduar Himnin Kombëtar.
Studentët kërkuan dorëheqjen e kryeministrit të vendit, Hristijan Mickoski, dhe ministrit të Drejtësisë, Igor Filkov. Ky i fundit provokoi studentët shqiptarë, vetëm pak orë para protestës, teksa deklaroi se “nuk ka provim në gjuhën shqipe, është çështje e mbyllur”.
Janë rreth 400 studentë shqiptarë, që studiojnë për drejtësi në tre universitetet e Maqedonisë së Veriut, dhe kërkojnë që provimin e jurisprudencës ta japin edhe në gjuhën shqipe, siç ua lejon ligji.
Kjo është protesta e dytë shqiptarëve në Maqedoninë e Veriut, ku gjatë tubimit u shoqëruan tre studentë.
Në mes të turmës u shfaq një djalë i vogël i veshur me jelek tradicional shqiptar, i cili mbante një pankartë me mbishkrimin: “Mos ma përktheni të ardhmen!!”. Mesazhi i tij u shpërnda me shpejtësi në rrjetet sociale dhe u kthye në simbolin emocional të protestës.
Ndërkohë që në Shkup mbahei protesta e studentëve shqiptarë për gjuhën shqipe, zëvendëskryeministri Bekim Sali ka thënë në Kuvend, se provimi i jurisprudencës do të jepet në gjuhën shqipe. Ai shjtoi se studentët kanë të drejtën e tyre për të protestuar dhe ata po e bëjnë për frontin europian.
Marrë nga Top Channel
