Grupi i punës për Zgjerimin e Bashkimit Evropian, COELA miratoi raportin e Vlerësimit të Pikave të Ndërmjetme për progresin e deritanishëm të Shqipërisë.
Raporti final i IBAR i miratuar nga COELA, i cili nesër u kalon ambasadorëve të vendeve të BE, liston një sërë kritikash për qeverinë tonë lidhur me ecurinë e vendit në procesin e Integrimit.
Në raport theksohet, se korrupsioni në institucione mbetet shqetësues dhe jo në nivelet e BE-së.
Raporti përmend për herë të parë edhe rrjetet patronazhiste si problem që cenon standardet zgjedhore.
Në raport listohen edhe kritika e kushte të reja për pronat, zonat bregdetare dhe të drejtat e minoriteteve.
Dokumenti shton gjithashtu kërkesa konkrete për zbatimin e vendimeve të Gjykatës Kushtetuese dhe respektimin e standardeve të Komisionit të Venecias për imunitetin, reformën në polici dhe mbrojtjen e të drejtave të minoriteteve.
BE thekson se korrupsioni vijon të mbetet i përhapur në shumicën e fushave të jetës publike dhe biznesit, duke përfshirë të gjitha nivelet e qeverisjes qendrore dhe vendore.
Theksi kryesor vihet mbi sektorët më të ekspozuar ndaj abuzimeve, ku sipas BE-së nevojitet zbatim më i fortë i ligjit.
Në veçanti përmenden tatimet, kadastra, shëndetësia, prokurimet publike, koncesionet dhe kontratat e partneritetit publik-privat (PPP), ku sipas vlerësimit në këta sektorë korrupsioni është në nivele shqetësuese. •
Ndryshimet tregojnë se vendet e Bashkimit Europian kanë kërkuar kushte më të forta dhe më konkrete për Shqipërinë përpara avancimit të mëtejshëm të negociatave.
Ky dokument pritet të kalojë nesër në COREPER, mbledhja e ambasadorëve të vendeve anëtare të BE-së.
Pas kalimit në COREPER, hapi i radhës do të jetë Konferenca Ndërqeveritare Shqipëri-BE, që do të mbahet më 26 maj në orën 19:30.
Marrë nga Dosja.al
