Të ardhurat e mbledhura nga Tatimi mbi Fitimin këtë vit janë më të ulëta se parashikimet Kuadrin Makroekonomik 2026-2028, kryesisht prej krizën ne sektorin e industrisë.
Ministria e Financave në analizën Raporti i “Devijancave të Parashikimeve“ se të ardhurat nga ky tatim këtë vit kanë shënuar një devijim negativ prej -4 miliardë lekësh (mbi 40 mln euro), apo rreth -0.1% e Produktit të Brendshëm Bruto (PBB), krahasuar me Kuadrin Makroekonomik. Ky nën-realizim lidhet kryesisht me përformancën e dobët të industrisë dhe veçanërisht me tkurrjen e fitimeve në sektorin e prodhimit, i cili i vetëm ka sjellë në buxhet 3 miliardë lekë më pak se parashikimi.
Dokumenti i Ministrisë së Financave hedh dritë mbi ecurinë negative të industrisë, duke sqaruar se tkurrja ka ardhur si pasojë e një rënieje të fortë të pagesave në shtyllat kryesore të industrisë, energjia dhe fabrikat përpunuese.
Tkurrja e xhiros dhe fitimeve në sektorin e energjisë elektrike, në rrjetin e transmetimit, si dhe në industrinë fason ka krijuar një efekt zinxhir.
Sipas Ministrisë së Financave kjo situatë është shtrirë në mënyrë të përhapur në plot 28 nënsektorë industrialë, duke dëshmuar për një ngadalësim të gjerë të aktivitetit prodhues në vend.
Nënçmimi i vazhdueshëm i monedhës vendase ndaj euros ka zhvlerësuar të ardhurat e industrisë eksportuese, duke ulur ndjeshëm marzhet e tyre të fitimit.
Së dyti, rritja e kostove të brendshme të fuqisë punëtore, e diktuar nga mungesa e krahut të punës dhe rritja e pagave minimale e mesatare, ka shtuar presionin financiar mbi kompanitë prodhuese.
Gjithashtu rënia e kërkesës në tregjet ndërkombëtare për disa mallra bazë, si dhe stabilizimi i çmimeve të energjisë krahasuar me vitet e krizës uli fitimin e jashtëzakonshëm.
Edhe pse inflacioni i përgjithshëm ka rënë, kostot e lëndëve të para industriale, makinerive dhe transportit mbeten të larta krahasuar me periudhën e para-krizës. Ndërmarrjet prodhuese shpesh e kanë të pamundur t’ia kalojnë këto kosto shtesë klientit final, duke u detyruar t’i observojnë vetë, gjë që vjen me koston e tkurrjes së fitimit të tyre.
Raporti i “Devijancave të Parashikimeve“ nënvizon se, megjithëse sektorët e shërbimeve, tregtisë dhe ndërtimit patën një ecuri pozitive dhe shënuan rritje gjatë kësaj periudhe, ky vrull nuk ka qenë i mjaftueshëm për të kompensuar humbjet e mëdha dhe rënien e përgjithshme të regjistruar nga sektori i industrisë.
Marrë nga Monitor
