Një investigim i publikuar nga e përditshmja britanike “The Sun” ka nxjerrë në pah se mijëra emigrantë të dëbuar më herët nga Mbretëria e Bashkuar janë rikthyer sërish në vend gjatë viteve të fundit.
Sipas të dhënave të analizuara për periudhën pesëvjeçare, janë regjistruar mbi 4,600 raste hyrjesh të reja nga persona që më parë ishin larguar me forcë. Nga këta, të paktën 723 individë janë deportuar më shumë se një herë. Në krye të listës renditen shtetasit shqiptarë, me rreth 1,525 raste, duke përbërë më shumë se një të tretën e totalit. Pas tyre vijnë emigrantë nga Iraku, Lituania, Afganistani dhe Rumania.
Raporti përfshin edhe statistikat e vitit 2025, ku janë shënuar mbi 26,000 kthime vullnetare dhe rreth 8,600 deportime të detyruara. Kostoja mesatare e një dëbimi të detyruar llogaritet rreth 48,800 paund, çka ka ngritur pikëpyetje mbi efektivitetin e sistemit britanik të emigracionit.
Ky investigim publikohet në një moment kur emigracioni është një nga temat më të nxehta politike në Mbretërinë e Bashkuar. Që prej korrikut 2024, kur Keir Starmer mori detyrën e kryeministrit, mbi 76,000 emigrantë të paligjshëm kanë kaluar Kanalin e La Manshit, pavarësisht marrëveshjes me Francën të njohur si një brenda, një jashtë, e cila synon të frenojë fluksin e hyrjeve të paligjshme.
Marrë nga The SUN
