Sadik Duraku, 54-vjeçari, baba i tre fëmijëve që jeton në Brighton, u arrestua më 17 prill 2024 teksa po udhëtonte për të vizituar të afërmit në Kosovë.
Ai aktualisht po mbahet në një burg të Beogradit, i akuzuar për kryerjen e krimeve të luftës si pjesëtar i Ushtrisë Çlirimtare të Kosovës (UÇK) në vitet 1990, akuza që familja e tij dhe ekipi ligjor i mohojnë.
Ministria e Punëve të Jashtme e Mbretërisë së Bashkuar (FCDO) tha: “Ne po mbështesim një britanik të arrestuar në Serbi dhe jemi në kontakt me autoritetet lokale”.
Duraku ka lindur në Kosovë, e cila në atë kohë ishte pjesë e Jugosllavisë. Në vitin 1998, atij dhe familjes së tij iu dha azil në Mbretërinë e Bashkuar.
Ai u bë shtetas britanik në vitin 2002 dhe ndërtoi një jetë duke drejtuar një biznes larje makinash përpara se të dilte në pension për shkak të shëndetit të keq.
Në prill, Duraku u arrestua teksa po kalonte kufirin serbo-hungarez, një udhëtim që ai e kishte bërë shumë herë më parë.
Këtë herë, ai u ndalua nga policia kufitare serbe dhe u akuzua për krime lufte që dyshohet se janë kryer si pjesëtar i UÇK-së.
Po atë ditë, mbi 1000 persona të tjerë u arrestuan nga autoritetet serbe, por vetëm një numër i vogël u akuzuan përfundimisht.
Akuzat fillestare kundër Durakut ishin për pjesëmarrje në krimet e luftës kundër popullatës lokale në vitin 1999.
Familja e tij është e bindur se këto akuza janë të pabazuara dhe thonë se ai nuk ka qenë fare i përfshirë në luftë, nuk ka qenë pjesëtar i UÇK-së dhe nuk ka marrë pjesë në ndonjë dhunë.
Avokati i Durakut me bazë në Mbretërinë e Bashkuar, Michael Polak nga Justice Abroad, tha se e gjithë çështja mbështetet kryesisht në një letër. Ai tha se letra nuk duket se është nga një adresë e vërtetë dhe përmban thirrje për të torturuar Durakun derisa të dalë e vërteta prej tij.
“Kjo është një akuzë për krime lufte e bazuar në këtë dëshmi vërtet të dobët të kësaj letre. Ai është një person me probleme shëndetësore, dikush që duhet të lirohet me kusht që të kthehet në Mbretërinë e Bashkuar”, tha Polak.
Për këtë situatë ka reaguar dhe bashkëshortja e Durakut, e cila shprehet se Britania e Madhe nuk ka bërë mjaftueshëm për të ndihmuar partnerin e saj.
“Jemi të gjithë të shkatërruar. Nuk ka asnjë moment të ditës ku nuk jeni të stresuar për këtë. Ai është britanik dhe kështu ne menduam se qeveria jonë do t’i mbronte të drejtat e tij dhe do të kujdesej për të, por nuk e ka bërë, dhe ne jemi të zhgënjyer pafundësisht në çdo hap”, u shpreh ajo.
