Elbasani vijon të përballet me nivele të larta të ndotjes së ajrit dhe renditet si qyteti me situatën më shqetësuese në vend, sipas Raportit të Gjendjes në Mjedis për vitin 2025, të publikuar nga Agjencia Kombëtare e Mjedisit.
Raporti tregon se dioksidi i azotit ka tejkaluar kufijtë e lejuar vetëm në Elbasan, një situatë që lidhet kryesisht me aktivitetin e industrisë së rëndë në këtë zonë.
Shqetësuese paraqitet edhe prania e grimcave PM10, të cilat lidhen ndër të tjera me trafikun rrugor. Ekspozimi ndaj niveleve të larta të ndotjes së ajrit mund të shkaktojë ose përkeqësojë sëmundjet e zemrës dhe mushkërive, ndërsa lidhet edhe me rreziqe të tjera për shëndetin.
Ambientalisti Ahmet Mehmeti ngre alarmin për situatën, duke ia atribuar përgjegjësinë institucioneve. Sipas tij, mungesa e specialistëve dhe e infrastrukturës së nevojshme për monitorimin e ndotjes po çon në kompromise që rëndojnë mbi shëndetin e banorëve.
Në të njëjtën linjë është edhe këshilltarja e opozitës në Këshillin Bashkiak të Elbasanit, Bianka Çopja. Ajo e cilëson raportin e Gjendjes së Mjedisit si një “këmbanë alarmi”, duke theksuar se koston e kësaj situate e paguajnë qytetarët.
Çopja paralajmëron gjithashtu se ndotja e lartë mund të ndikojë në largimin e banorëve nga qyteti, si dhe të krijojë probleme për aktivitetin ekonomik dhe bizneset.
Problematika nuk kufizohet vetëm te Elbasani. Edhe kryeqyteti paraqitet me nivele shqetësuese të ndotjes. Në Tiranë, përqendrimi i grimcave PM10, të cilat qëndrojnë pezull në ajër dhe mund të depërtojnë në rrugët e frymëmarrjes, ka tejkaluar kufijtë vjetorë të lejuar.
Raporti i AKM-së rikthen kështu në vëmendje problemin e ndotjes së ajrit dhe nevojën për masa konkrete për mbrojtjen e shëndetit publik dhe përmirësimin e cilësisë së mjedisit.
Marrë nga Syri.net
