Nga Irena Beqiraj
Audio-përgjimi që dëgjuam dje tregoi se korrupsioni i zakonshëm administrativ që thyen rregullat është tejkaluar. Në shtetin aktual shqiptar, rregullat i rishkruan Roni.
Audio-përgjimi tregoi se ne operojmë në “Shtetin e Ronit”, ku menaxhimi i pronës publike riorganizohet në mënyrë të tillë që shfrytëzimi i saj të kanalizohet vetëm në duart e Ronit dhe sojit të tij, duke anashkaluar rregullat e transparencës dhe llogaridhënies.
Audio-përgjimi i djeshëm ishte prova më e pastër se si ligji përdoret si instrument nxitës i njëanshëm për transferimin e parave pa procedura garuese, pa transparencë e pa llogaridhënie, nga buxheti te Roni, i cili haptazi thotë se është i panginjur dhe dëshiron të bëjë më shumë para.
Në “shtetin e Ronit”, i cili ka filluar të ngrihet që më 2018, shtrembërimi i procedurave të prokurimit kryhet lehtësisht me anë të ndërmarrjeve shtetërore (NSH), të cilat përdoren si instrument për legjitimimin e korrupsionit. “Modeli Kayo” dhe rrjeti i kompanive të krijuara nën të nuk është gjë tjetër veçse një variant më i përsosur i vjedhjes që filloi po me Ronin në 2018 me krijimin e Air Albania-s, sot të falimentuar. Modeli Kayo që po replikohet te një tjetër kompani tregtare, e cila do të zotërojë milionat që menaxhonte AKSHI, apo te kompania e barnave, janë shembuj ekselentë të përdorimit të ndërmarrjeve shtetërore si tuba për të transferuar prona dhe para publike pa procedurë, pa tendera e pa garë, pa kontroll, nën kujdesin e Ramës, te soji i Ronit, të cilët e shuajnë etjen për para te buxheti i shtetit më të varfër në Evropë.
Në shtetin e Ronit, Roni qeveris, Rama administron, korrupsioni legjitimon, presioni blen heshtjen. Sa më shumë konsolidohet kjo mënyrë qeverisjeje, aq më shumë dëmet janë të pakthyeshme. Besa, Pasqyrat e Prania Besnike janë thjesht manovra për të maskuar dhimbjet e degradimit.
Për dhëmbët me faceta të Ronit, shteti lipset t’i dorëzohet arrë e qëruar. Për këtë nevojitet Ermal Nufi, i cili ka ambicie që nga zëvendëssekretar në Kryeministri të bëhet ministër. Ermali e di mirë që Rama promovon vetëm ata që qërojnë dardha, kumbulla e arra për të dhe për Ronin, ndaj për të kënaqur ambicien nuk heziton të shërbejë duke bërë skeletet e nevojshme në dollap.
Por as ai i vetëm nuk mjafton. Që shteti të drejtohet si kompani private e Ronit me administrator Kryeministrin, duhet që në Kuvend Partia Socialiste të çojë mercenarë, të gatshëm të certifikojnë çdo ditë ligjet që i shërbejnë vetëm Ronit. Ndaj me kujdes zgjidhen njerëz që nevoja, ambicia a ligësia i ka zhveshur nga skrupujt dhe janë të gatshëm t’i ofrojnë opinionit publik kornizën ideologjike që justifikon përdorimin e institucioneve shtetërore për t’i shërbyer interesave të ngushta të Ronit.
Por që Roni jo vetëm të pasurohet, por të duket i zoti dhe i mençur, nuk mjafton Taulanti, Ulsiu, Zeqineja, Sara, Zamira apo edhe Bajram Bega; nevojitet edhe përfshirja e avokatëve, ekspertëve që hartojnë legjislacione ose transaksione që favorizojnë transferimin e burimeve publike në duart e Ronit.
Me pjesëmarrjen aktive të një armate shpirtshitur, shqiptarët e gjejnë veten duke jetuar në një shtet që duket si demokraci në letër, por në realitet funksionon si kartel.
Ky është shteti i Ronit që administrohet nga Kryeministri!
Marrë nga Shteg.org
