Për të dytën ditë radhazi, administrata e Gjykatës së Tiranës vijon bojkotin për shkak të ngërçit me pagat e muajit gusht. Punonjësit dhe sekretarët gjyqësorë të Dhomës Civile dhe asaj Penale nuk po ofrojnë shërbime, ndërsa kërkojnë sqarime se kur do të ekzekutohen pagat e tyre.
Për të mos penalizuar personat e arrestuar, do të zhvillohen vetëm seancat që lidhen me caktimin e masave të sigurisë. Një ditë më parë, bojkotit iu bashkua edhe administrata e Gjykatës së Apelit.
Ngërçi i krijuar me pagat në sistemin e drejtësisë solli të martën edhe mbledhjen e kryetarëve të gjykatave në Gjykatën e Lartë, ku u vendos që më 10 shtator të thirret një mbledhje e jashtëzakonshme e Përgjithshme e Gjyqtarëve.
Edhe Prokurori i Përgjithshëm, Olsian Çela, zhvilloi një takim me drejtuesit e prokurorive, përfaqësues të Këshillit të Lartë të Prokurorisë dhe Shoqatës së Prokurorëve. Gjatë takimit u theksua nevoja për një zgjidhje të shpejtë nga Kuvendi, në respektim të vendimit të Gjykatës Kushtetuese.
Prokuroria e Përgjithshme njoftoi se “u dakordësua vijimi i trajtimit të kësaj çështjeje përmes instrumenteve ligjore, në funksion të garantimit të pavarësisë dhe funksionimit normal të sistemit të drejtësisë”.
Situata u krijua pasi Kuvendi nuk miratoi brenda afatit të 31 korrikut formulën e re për pagat e magjistratëve, siç kishte kërkuar Gjykata Kushtetuese. Pas përfundimit të afatit, KLGJ dhe KLP argumentuan se ishin të detyruara të zbatonin vendimin e Kushtetueses, duke përcaktuar pagën e re referuese në 222 mijë e 425 lekë, nga 156 mijë e 800 lekë që ishte më parë, si dhe një shtesë prej 14 mijë lekësh për nivelin e kualifikimit.
Ministria e Financave nuk i ekzekutoi listëpagesat e përllogaritura sipas formulës së re, duke argumentuar se përcaktimi i pagave është kompetencë e Kuvendit. Ministria kërkoi që listëpagesat të ridërgoheshin sipas metodologjisë së mëparshme.
Si pasojë e këtij ngërçi, pa marrë pagat e muajit gusht kanë mbetur jo vetëm gjyqtarët dhe prokurorët, por edhe punonjësit e administratës së gjykatave dhe prokurorive.
Marrë nga VNA.al
