Autoritetet greke arrestuan dy mjekë të klinikës private në qendër të Athinës, ku këngëtari I njohur Giorgos Mazonakis humbi jetën pasi pësoi arrest kardiak.
Mazonakis kishte shkuar për një seancë të planifikuar plazmafereze, (një procedurë terapeutike e specializuar për heqjen e plazmës së gjakut ) para se të pësonte arrest kardiak.
Ndaj tyre është hapur një dosje penale.
Autoritetet duhet t’u japin përgjigje një sërë pyetjesh kritike: çfarë ishte planifikuar konkretisht, nëse procedura kishte nisur apo jo, kush ishte përgjegjës për të, çfarë vlerësimi mjekësor ishte kryer paraprakisht dhe nëse klinika kishte licencën e nevojshme, pajisjet e përshtatshme dhe personelin e specializuar.
Një nga çështjet kryesore që autoritetet po përpiqen të sqarojnë është se çfarë ndodhi saktësisht para arrestit kardiak dhe nëse trajtimi i planifikuar kishte nisur.
Sipas raportimeve në mediat greke, mjekja që thuhet se ishte përgjegjëse për trajtimin e Mazonakis ka dëshmuar se plazmafereza nuk kishte nisur ende dhe se gjendja e tij u përkeqësua papritur ndërsa po bëheshin përgatitjet për procedurën.
Të njëjtat raportime, duke iu referuar dëshmisë së saj, thonë se Mazonakis kishte vizituar klinikën edhe një ditë më parë. Mjekja thuhet se e ka përshkruar gjendjen e tij si tashmë të rënduar dhe ka përmendur vështirësi në të folur.
Për këtë arsye, autoritetet pritet të shqyrtojnë se cilat simptoma ishin regjistruar, çfarë analizash ishin kryer, çfarë historie mjekësore ishte marrë dhe mbi çfarë baze ishte vlerësuar se procedura e planifikuar mund të kryhej.
Bashkëshorti i mjekes, i cili është gjithashtu mjek dhe në emër të të cilit është regjistruar klinika, raportohet t’u ketë thënë hetuesve se nuk e kishte trajtuar personalisht Mazonakis dhe se trajtimin e këngëtarit e kishte marrë përsipër bashkëshortja e tij.
Gjetjet e reja nga hetimi policor kanë ngritur pyetje të tjera lidhur me atë që ndodhi brenda klinikës.
Të enjten, policia kreu një kontroll të gjatë në ambientet e klinikës dhe sekuestroi pajisje elektronike, dokumente, produkte mjekësore dhe materiale të tjera. Më pas, një kontroll u krye edhe në banesën e dy mjekëve.
Sipas televizionit publik grek ERTnews, personeli i urgjencës u ka thënë hetuesve se aparatura e plazmaferezës ishte në funksion kur ata mbërritën në klinikë. Një kontroll fillestar teknik raportohet se ka treguar gjithashtu se, gjatë përdorimit të fundit, aparatura kishte qëndruar e ndezur për 45 minuta. Një ekzaminim më i detajuar pritet të përcaktojë saktësisht se kur ishte vënë në përdorim.
Policia po shqyrton gjithashtu një mospërputhje në kronologjinë e ngjarjeve. Mjekja raportohet të ketë thënë se Mazonakis kishte mbërritur rreth orës 16:30, ndërsa shërbimet e urgjencës ishin thirrur pak më herët. Hetuesit besojnë se këngëtari kishte qëndruar në klinikë për të paktën tre orë.
Marrë nga To Vima
