Para pak ditësh, redaksia e Vox News publikoi një investigim për një leje ndërtimi, të dhënë në mes të një lagjeje ekzistuese në zonën e ish-Parkut të Autobusëve, ku përfitues ishte ortaku i vjehrrit të Lul Bashës. Në dokumentet që hulumtoi Vox News, rezultoi se pallati do të ngrihej 12 kate mbi tokë dhe 2 kate nëntokë, ndërkohë që leja e dhënë nga qeveria është zbardhur kohët e fundit.
Ndërkohë, në redaksinë e Vox News kanë mbërritur të tjera informacione mjaft të dyshimta për dhënien e kësaj leje, ku rezulton se ndërtuesi apo ata që kanë firmosur lejen kanë bërë mashtrimin e radhës. Në zonën ku do të zhvillohet projekti, plani vendor i Bashkisë së Tiranës parashikon ndërtime deri në 8 kate, teksa leja e miratuar nga qeveria është plot 12 kate!
Në lejen e ndërtimit është edhe maketi i kullës. Me sy të lirë shihet mjaft qartë se ndërtuesi ka një gjurmë të vogël të katit të parë, teksa katet e sipërme i ka zgjeruar. Por, ky është “mashtrimi” për ta ngritur në lartësi, pasi është justifikuar se gjurma që do të zërë në tokë është me koefiçent të vogël, ndërkohë që katet e mësipërme zgjerohen.
“Parcela është 1106 metra katrorë dhe sipas PPV së Bashkisë Tiranë, që është dokument zyrtar në këtë zonë, në TR227 lejohen vetëm pallate 8 kate dhe 26 metra të lartë me gjurmë kati përdhe 45% dhe projeksion të katit më të madh 55 % të parcelës. Sipas PPV, nëse ndërtuesi fiton bonusin 30%, mund të rritet maksimumi 11 kate me kushtin që gjurma e katit përdhe bëhet minus 6 % për çdo kat mbi 8 kate”, thotë një burim nga qeveria për këtë leje.
Sipas denoncuesve, KKT ka shpikur një hile që mund të quhet edhe e trashë por më tepër e pistë.
“Katin përdhe e bëjnë gjysmën, vetëm me kolona, dhe hapësira me kolona nuk llogaritet në gjurmë. Këtë rregull me shumë rezerva dhe vetëm për raste ekstreme në qendrat e qyteteve të mëdha, e kanë disa vende dhe kryesisht kur duhet ruajtur një trotuar ose duhet zgjeruar një trotuar”, pohojnë të njëjta burime.
Me këtë “stil” të trashë dhe të pacipë, e gjithë Tirana mund të mbushet 100% me ndërtime, duke bërë këtë marifet, ku gjoja kati i parë do të bëhet lulishte mbi soletën e parkimit nëntokësor dhe nën soletën e kateve sipër.
“Këtu e kanë quajtur gjysmën e gjurmës arkade dhe hapësirë rekreative me pemë, mbi soletën e parkimit dhe poshtë soletës së katit të parë”, vijon burimi.
Me këtë mashtrim ndërtuesi ka shtuar katet dhe ka dyfishuar sipërfaqet e kateve sipër, teksa nga llogaritet e bëra rezulton se aktualisht do të ndërtohen 5776 metra katrorë mbi tokë në vend të 3960 metra katrorë. Pra, diferenca vetëm nga intensiteti është plot 1816 metra katrorë, metra të cilat firma i ka reklamuar me 2200 euro (4 milionë euro).
“Qeveria, përveçse ka sjellë një fitim të paligjshëm plus 4 milionë euro, ka ngushtuar distancat me pallatet ngjitur, sepse quan gjurmën e vogël dhe jo fasadën gjigande me projeksion 540 m2”, pohojnë burimet.
Mësohet se në atë nën njësi nr.5 të zonës TR227 ishte planifikuar, dhe ligji i jep përparësi, një kopsht publik. Dhe, pa u ndërtuar apo gjetur sipërfaqja për kopshtin, ligji ndalon çdo zhvillim.
Marrë nga VoxNews.al
