Lionel Messi pritet të zhvillojë ndeshjen e fundit me fanellën e Argjentinës më 6 tetor, kur kampionët e botës do të përballen me Beninin në stadiumin “Monumental” të Buenos Airesit.
39-vjeçari është përfshirë në listën e Argjentinës për këtë miqësore, e cila pritet të shënojë lamtumirën e tij nga kombëtarja pas një karriere ndërkombëtare prej dy dekadash.
Presidenti i Federatës së Futbollit të Argjentinës, Claudio Tapia, tha se Messi është ftuar për t’i dhënë lamtumirën që meriton para tifozëve argjentinas.
“Ne morëm vendimin për të ftuar lojtarin më të mirë në botë, simbolin e ekipit tonë kombëtar, kapitenin tonë, Lionel Andres Messi, në mënyrë që ai të mund të marrë lamtumirën që meriton vërtet më 6 tetor këtu në Argjentinë”, deklaroi Tapia.
Ndeshja do të zhvillohet në “Monumental”, stadium që ka kapacitet rreth 85 mijë tifozë, ndërsa Tapia ka ftuar edhe të gjithë futbollistët e Argjentinës që u shpallën kampionë të botës në vitin 2022, për t’iu bashkuar Messit në këtë ceremoni.
Messi kishte njoftuar në gusht se po tërhiqej nga kombëtarja, pas një karriere në të cilën fitoi Kupën e Botës 2022 dhe dy herë Copa America, në vitet 2021 dhe 2024.
Nëse paraqitet ndaj Beninit, Messi do ta zhvillojë ndeshjen e tij të 208-të dhe të fundit për Argjentinën. Ai është golashënuesi më i mirë në historinë e kombëtares, me 125 gola.
Lamtumira e tij vjen në një periudhë të ndjeshme për yllin argjentinas, i cili muajin e kaluar humbi babain e tij, Jorge Messi. Pas kësaj ngjarjeje, ai kishte shprehur dyshime nëse do të vazhdonte të luante futboll për shumë më gjatë.
Messi ndërkohë vazhdon të jetë pjesë e Inter Miamit, me kontratë të vlefshme deri në fund të sezonit 2028.
Marrë nga Ina-online.net
