Shoqëria DEL-CNG SHPK ka reaguar pas publikimit të një audiomateriali të transmetuar në media, duke e cilësuar atë si rezultat të një përgjimi të paautorizuar në ambientet private të kompanisë.
Në një deklaratë zyrtare, shoqëria thekson se administratori, punonjësit dhe bashkëpunëtorët e saj nuk kanë pasur dijeni dhe nuk kanë dhënë pëlqim për incizimin apo transmetimin e materialit.
DEL-CNG sqaron gjithashtu se Ron Yeffet nuk është përfaqësues, punonjës, ortak apo administrator i kompanisë dhe se nuk ka autorizim të veprojë apo të marrë angazhime në emër të saj. Shoqëria deklaron se nuk ka marrëdhënie biznesi me të dhe se takimi me të nuk përbën miratim të qëndrimeve të shprehura prej tij.
Kompania hedh poshtë çdo aludim për skema kriminale, përfitime të paligjshme apo marrje të paligjshme asetesh. Sipas deklaratës, përfaqësuesit e saj kanë kërkuar që çdo propozim apo procedurë të ndiqet vetëm në rrugë të ligjshme.
DEL-CNG thekson se dëgjimi i një propozimi apo bërja e pyetjeve gjatë një takimi privat nuk përbën miratim apo përfshirje në veprimtari të paligjshme. Shoqëria deklaron gjithashtu se nuk ekziston ndonjë masë urgjente nga autoritetet shqiptare, si sekuestrim, marrje asetesh apo vendim gjyqësor ndaj saj.
Në përfundim, DEL-CNG kërkon ndërprerjen e publikimit të materialeve, anonimizimin e plotë të punonjësve dhe bashkëpunëtorëve dhe publikimin e qëndrimit të saj, duke theksuar se liria e medias respektohet, por nuk duhet të shoqërohet me përdorimin e përgjimeve të paligjshme apo nxjerrjen e bisedave jashtë kontekstit.
Marrë nga Oranews.tv
