Paketa fiskale 2027 rrezikon të shtojë presionin mbi bizneset duke rritur taksat mbi fitimin dhe dividendin ndërsa njëkohësisht zgjeron numrin e subjekteve që do të detyrohen të paguajnë TVSH.
“Rritja e normës së tatimit mbi të ardhurat e korporatave nga 15% në 17% synon një shpërndarje më të balancuar të barrës tatimore, duke rritur kontributin e të ardhurave nga fitimi në raport me të ardhurat nga punësimi. Kjo masë vlerësohet të ketë një efekt pozitiv në të ardhurat buxhetore prej rreth 5 miliardë lekësh në vit.
Sipas përllogaritjeve të Ministrisë së Financave, vetëm këto dy ndryshime pritet t’i sjellin buxhetit të shtetit 8 miliardë lekë të ardhura shtesë në vit, ose rreth 85 milionë euro. Në anën tjetër kjo shumë përkthehet në një barrë më të lartë tatimore për bizneset duke pakësuar fitimin që u mbetet për investime, zgjerim të aktivitetit dhe krijim të vendeve të reja të punës.
Ndryshime edhe në skemën e tatimit mbi vlerën e shtuar (TVSH) për bizneset
Presioni fiskal shtohet edhe më tej me uljen e pragut të regjistrimit në skemën e TVSH-së. Por me paketën e re fiskale, qeveria propozon ndryshime edhe në skemën e Tatimit mbi Vlerën e Shtuar (TVSH) për bizneset.
Teksa që nga janari i vitit 2021 bizneset me xhiro deri 10 milionë lekë në vit nuk kanë paguar TVSH një premtim nga qeveria që thuhej se do të zgjaste deri në 2029-ën, kjo e fundit bën një hap pas dhe vendos që ta ulë pragun nga 10 milionë në 5 milionë lekë në vit. Kjo do të thotë se nga viti i ardhshëm të gjitha bizneset me xhiro mbi 5 milionë lekë do të paguajnë TVSH-në prej 21%.
Kështu rreth 17.516 tatimpagues të tjerë pritet të përfshihen në skemë duke u përballur me detyrime të reja deklarimi dhe administrimi tatimor.
Ndryshime që parashtrohen në projektvendimin “Për disa ndryshime në vendimin nr. 953, datë 29.12.2014, “për dispozitat zbatuese të ligjit nr. 92/2014, ‘për tatimin mbi vlerën e shtuar në republikën e Shqipërisë’, të ndryshuar.
Projektvendimi për tatimin mbi vlerën e shtuar
“Krahasuar me vendet e rajonit dhe me vendet anëtare në Bashkimin Evropian, aktualisht vendi ynë aplikon një kufi minimal të regjistrimit për TVSH-në prej 10 milionë lekë në vit, ose rreth 108, 696 euro, që është ndjeshëm më lartë sesa kufiri minimal i regjistrimit për TVSH-në në këto vende. Në tabelën e mëposhtme paraqitet kufiri minimal regjistrimit në vendet e Ballkanit Perëndimor, përfshirë edhe disa vende të BE-së”
Sipas relacionit, ulja e pragut synon formalizimin e mëtejshëm të ekonomisë, zgjerimin e bazës së tatueshme dhe përmirësimin e administrimit të TVSH-së.
Kufiri minimal për regjistrim TVSH-je, BP&BE, viti 2026
Vendet Kufiri (në Euro)
Shqipëri 108,695.65
Itali 85,000
Bosnia Hercegocina 51,130
Bullgari 51,130
Slloveni 60,000
Kroaci 60,000
Mali i Zi 30,000
Kosova 30,000
Maqedoni e Veriut 32,500
Serbi 68,000
Greqi 10,000
Por ky kufi përjashton një kategori biznesesh.
“Përfshirja e subjekteve në regjimin normal të TVSH-së mundëson deklarimin e transaksioneve të shitjeve dhe blerjeve nga të gjitha palët e përfshira në transaksion, duke mundësuar gjithashtu kryqëzimin e këtij informacioni në funksion të mirëadministrimit të tatimit. Ndërkohë, në përcaktimin e kufirit minimal të regjistrimit për TVSH-në prej 5 (pesë) milion lekë, është mbajtur në konsideratë fakti se, ky kufi përjashton ato biznese që janë kryesisht biznese familjare dhe me të vetëpunësuar të vetëm.”
Nga të gjitha ndërhyrjet në taksa buxheti i shtetit pritet të përfitojë të ardhura shtesë.
Reagimi i bizneseve
Kjo ulje e pragut që pritet ti bashkëngjitet paketës fiskale ka sjellë dhe reagimin e bizneseve të cilat e konsiderojnë të padrejtë një ndryshim të tillë.
Sipas deklaratës së Shoqatës, propozimet e reja të Paketës Fiskale 2027 kërkojnë një diskutim serioz me përfaqësuesit e biznesit përpara miratimit të tyre. Shoqata kërkon që të mos përsëritet praktika e vendimmarrjeve të njëanshme, siç ka ndodhur në vitet e mëparshme, pa një konsultim real dhe pa analizuar ndikimin në sektorët prodhues.
PRO EKSPORT ALBANIA
“Prej vitesh ky sektor përballet me zhvlerësimin e euros, rritjen e kostove, reduktimin e kapaciteteve prodhuese dhe humbjen e vendeve të punës. Në vend të masave që nxisin investimet, automatizimin, digjitalizimin dhe kalimin drejt prodhimit me vlerë të shtuar, po diskutojmë rritje të mëtejshme të barrës fiskale. Nuk jemi kundër reformave fiskale, por kundër vendimeve që merren pa vlerësuar pasojat reale mbi prodhimin, eksportet dhe punësimin.”
Marrë nga Top Channel
