Ministria Britanike e Drejtësisë është duke vlerësuar nëse disa nga kriminelët e vendit mund të dërgohen për të vuajtur dënimin në burgjet e Estonisë, në mënyrë që të merret me mbipopullimin në burgjet vendase, raportoi The Telegraph.
Shteti baltik tha në fund të muajit të kaluar se mund të jepte me qira hapësirën e burgut dhe të presë kriminelë nga vende të tjera, për të gjeneruar të ardhura për buxhetin e shtetit.
Sipas raportit, i cili citon burime të qeverisë britanike, zgjidhja e diskutueshme ishte “në tryezë” për shkak të ashpërsisë së situatës. Ministria e Drejtësisë tha se po hetonte “të gjitha opsionet e mundshme” për të rritur kapacitetin sepse burgjet në MB ishin “në pikën e kolapsit”.
Burgjet e burrave në Angli dhe Uells thuajse mbetën pa qeli muajin e kaluar, me vetëm 83 hapësira rezervë, shkroi The Telegraph. Në përgjithësi, popullsia britanike e burgjeve pritet të rritet nga rreth 89,000 në mes 93,100 dhe 106,300 deri në mars 2027.
Ndërkohë, shkalla e ulët e krimit të Estonisë do të thotë se burgjet e saj janë gjysmë bosh dhe qeveria në Talin pret që plani i saj i marrjes me qira të burgjeve mund të japë 30 milionë euro shumë të nevojshme, në vit.
Sekretarja e Drejtësisë në Mbretërinë e Bashkuar Shabana Mahmood dhe homologja e saj estoneze, Liisa Pakosta, pritej të diskutonin për dhënien me qira të burgjeve në margjinat e një ngjarjeje të Këshillit të Evropës në Vilnius, Lituani, të enjten.
Megjithatë, zyrtarët britanikë janë të shqetësuar se ideja mund të rezultojë të jetë “shumë e shtrenjtë”. Ata tashmë kanë përjashtuar mundësinë e dhënies me qira të hapësirës në burgje në vende të tilla si Holanda, ku shteti shpenzon rreth 100,000 £ për të burgosur.
Në Evropën Lindore dhe shtetet baltike si Estonia, shpenzohen nga 10,000 deri në 20,000 £ për të burgosur, thuhet në raport. Shpenzimet për strehimin e një të burgosuri në Angli dhe Uells janë gati 50,000 £, ndërsa kostoja e ndërtimit të një burgu është 600,000 £ për të burgosur.
