Një blog i gjeneruar nga inteligjenca artificiale në faqen e internetit të një kompanie turistike i ka çuar turistët në ujëra ‘termalë’, por jo në llojin që po kërkonin, pasi doli në pah se burimet e nxehta “të qeta” të Tasmanisë veriore që rekomandoheshin, nuk ekzistojnë në të vërtetë.
Pamjet nga ekrani të blogut, tani të fshirë në faqen e internetit të Tasmania Tours, tregojnë rekomandime për “Weldborough Hot Springs”, që thuhet se ofrojnë “një arratisje paqësore” në pyjet e Tasmanisë verilindore, Australi. E përshkruar si një “strehë e qetë”, vendi reklamohej si “i preferuar” midis shëtitësv.
Weldborough është një qytet i vogël rural rreth 110 kilometra (68 milje) nga qyteti i Launceston.
Scott Hennessey, pronari i Australian Tours and Cruises me seli në Uellsin e Ri Jugor, i cili operon Tasmania Tours, i tha Rrjetit Australian të Transmetimeve (ABC) në fillim të këtij muaji se “Inteligjenca Artificiale e jonë ka bërë rrëmujë plotësisht”.
Ai tha se kompania ia kishte dhënë materialin e saj të marketingut një pale të tretë dhe, ndërsa ai normalisht shqyrton çdo postim, blogu u botua ndërsa ai ishte jashtë vendit.
Australian Tours and Cruises i thanë CNN të martën se “urrejtja online dhe dëmtimi i reputacionit të biznesit tonë ka qenë absolutisht shkatërrues për shpirtrat”.
Kristy Probert, pronare e hotelit lokal Weldborough, i tha CNN se u hutua kur turistët filluan t’i bënin pyetje në lidhje me burimet termale në shtator.
Anne Hardy, profesoreshë e asociuar në turizëm në Universitetin Southern Cross, Australi, i tha CNN se inteligjenca artificiale ishte bërë “e kudondodhur në udhëtime dhe turizëm”, duke shtuar se rreth 37% e turistëve përdorin inteligjencën artificiale për këshilla udhëtimi ose itinerare.
“Turistët i besojnë më shumë inteligjencës artificiale sesa faqeve të vlerësimeve”, tha ajo, duke shtuar se operatorët turistikë përdorin inteligjencën artificiale jo vetëm për blogje dhe materiale marketingu, por edhe për itinerare dhe përcaktimin e kostos.
Megjithatë, ajo paralajmëroi se kjo mund të krijojë edhe pasaktësi ose “halucinacione”, si “burimet e nxehta” të Weldborough.
Marrë nga CNN
