Elektorati në Izraelvotoi me një pjesëmarrje të lartë për parlamentin e ri, por rezultati duket se nuk ka nxjerrë një fitues të qartë. Sipas transmetuesit publik KAN, blloku pro-Netanjahu ka siguruar 50 mandate, ndërsa blloku anti-Netanjahu 53. Dy parti palestineze kanë fituar së bashku 17 mandate. Për të siguruar një shumicë të qëndrueshme nevojiten të paktën 61 mandate.
Benjamin Netanjahu,kryeministri më jetëgjatë në detyrë në historinë e Izraelit, po përballet me një sfidë të fortë për të ruajtur pushtetin.Rivali i tij kryesor është ish-shefi i ushtrisë, Gadi Eisenkot.
Partia Ra’am kthehet në faktor vendimtar politik
Kandidati palestinez Mansour Abbas, kreu i partisë Ra’am, mban në krah vajzën e tij ndërsa voton në një qendër votimi në ditën e zgjedhjeve kombëtare të Izraelit, në Maghar, Izrael, më 27 tetor 2026.
Dita e votimeve ishte një ditë e suksesshme për partinë Ra’am të Abbasit. Suksesi i Ra’am-it, për të cilën sondazhet pas mbylljes së votimit parashikojnë shtatë mandate, do të thotë se asnjë qeveri izraelite nuk mund të formohet pa një rol të partisë fetare myslimane.
Partia kishte tërhequr vëmendjen më herët pasi emëroi Yoav Segalovichin, një ish-drejtues të lartë hebre të policisë, si kandidatin e dytë pas kreut të partisë, Mansour Abbas. Kriminaliteti dhe dhuna e përhapur në komunitetin arab dhe palestinez, si edhe lufta në Gaza, mund të kenë ndikuar në rezultatin e Ra’am-it.
Si koalicioni i drejtuar nga Likud-i, ashtu edhe pjesë të mëdha të opozitës izraelite e kanë përjashtuar një koalicion me Ra’am-in. Por rezultatet e deritanishme mund t’u lënë pak alternativa, duke i detyruar të kërkojnë një formë bashkëpunimi me këtë parti.
Siç u shpreh një ekspert izraelit i sondazheve: „Sonte izraelitëve iu kujtua se në mesin e popullsisë së tyre ka edhe arabë dhe palestinezë me shtetësi izraelite.”
Sondazhet: Blloku i Netanjahu-t mbetet prapa
Sondazhet e televizioneve kryesore izraelite pas mbylljes së votimit tregojnë se shumica e izraelitëve kanë votuar kundër koalicionit të kryeministrit Benjamin Netanjahu. Megjithatë, partia e tij Likud rezulton forca e vetme më e madhe në Knesset, me 25 mandate të parashikuara.
Blloku i rivalit Gadi Eisenkot rezulton grupimi më i madh, me 53 mandate të parashikuara, pak përpara koalicionit qeverisës me 50. Megjithatë, ai mbetet dukshëm nën pragun prej 61 mandatesh që nevojiten për shumicën.
Asnjëri prej blloqeve nuk ka një shumicë të qartë pa mbështetjen e partive arabe.
Këto shifra të parashikuara vijnë nga transmetuesi publik Kan 11. Parashikimet e kanaleve të tjera ndryshojnë, por vetëm në masë të vogël.
Rezultatet e sondazheve pas mbylljes së votimit pritet të publikohen së shpejti në televizionet izraelite. Në përgjithësi, këto sondazhe konsiderohen relativisht të besueshme, por sigurisht bëhet fjalë vetëm për parashikime.
Rezultatet do të fillojnë të publikohen gradualisht gjatë natës dhe ka pak gjasa që numërimi të përfundojë para së mërkurës (28.10.2026).
Dhe sigurisht, edhe pasi të jenë numëruar votat dhe të publikohen rezultatet përfundimtare, mund të duhet të presim më gjatë derisa të bëhet e qartë se kush do të jetë në gjendje të formojë një qeveri koalicioni.
Komisioni zgjedhor i Izraelit njoftoi se deri në orën 14:00, në gjysmën e ditës së votimit, ishte regjistruar pjesëmarrja më e lartë ndonjëherë në zgjedhje.
Marrë nga DPA.de
