Estonia akuzoi Rusinë se tre avionë luftarakë rusë MiG-31 shkelën për 12 minuta pa leje hapësirën e saj ajrore. Estonia e quajti këtë veprim një ndërhyrje “pa precedent”, e cila përshkallëzon tensionet në krahun lindor të NATO-s.
Sipas zyrtarëve avionët nuk kishin plane fluturimi, pajisjet e tyre identifikuese ishin të fikura dhe ata nuk kryen radio-komunikim me shërbimet e trafikut ajror estonez gjatë shkeljes.
Në vijim Ministria e Jashtme e Estonisë thirri të ngarkuarin me punë të Federatës Ruse në Estoni për të paraqitur një protestë zyrtare dhe për të dorëzuar një notë në lidhje me shkeljen. Ministri i Jashtëm, Margus Tsahkna, e dënoi ashpër incidentin, duke e quajtur atë shkelje “pa precedent dhe brutale” të sovranitetit.
“Rusia e ka shkelur tashmë katër herë hapësirën ajrore estoneze gjatë këtij viti, gjë që në vetvete është e papranueshme, por shkelja e sotme, gjatë së cilës tre avionë luftarakë hynë në hapësirën tonë ajrore, është brutale dhe pa precedet”, tha ai.
Edhe Polonia njofton për shkelje të hapësirës ajrore
Pak orë pas shkeljes së hapësirës ajrore të Estonisë rojet kufitare të Polonisënjoftuan edhe se dy avionë luftarakë rusë kanë shkelur zonën e sigurisë së platformës së shpimit Petrobaltic në Detin Baltik.
Roja Kufitare Polake shkroi në X se “dy avionë luftarakë rusë kryen një fluturim të ulët mbi platformën Petrobaltic në Detin Baltik. Zona e sigurisë së platformës u shkel”.
Konsultime me NATO-n
Pas depërtimit të tre avionëve luftarakë rusë në hapësirën e saj ajrore Estonia do të kërkojë konsultime me aleatët sipas Nenit 4 të Traktatit të NATO-s. Kryeministri estonez, Kristen Michal, shkroi të premten në mbrëmje (19.09.) në shërbimin online X se qeveria e tij kishte vendosur ta bënte këtë për shkak të “shkeljes krejtësisht të papranueshme” të hapësirës ajrore.
Neni 4 i Traktatit të NATO-s parashikon konsultime midis shteteve anëtare në rast se një shtet anëtar mendon i është rrezikuar integriteti i tij territorial, pavarësia ose siguria.
Gjermania dënon ndërhyrjen e Rusisë në hapësirën ajrore të Estonisë
Ministri i Jashtëm gjerman, Johann Wadephul, e dënoi ndërhyrjen e Rusisë në hapësirën ajrore të Estonisë.
“Vigjilenca është çmimi i lirisë. Ky parim i NATO-s mbetet po aq i rëndësishëm sa gjithmonë. Shkelja e papranueshme e sotme e hapësirës ajrore të Estonisë nga Rusia e tregon qartë këtë”, shkroi Wadephul në X.
Ministri i jashtëm tha se e kishte siguruar homologun e tij estonez, Margus Tsahkna, për “solidaritetin e plotë” të Gjermanisë.
Marrë nga Deutsche Welle
