Donald Trump do të dënohej për tentimin për të marrë pushtetin në vitin 2020, por shpëtoi falë fitores në zgjedhjet e vitit 2024, sipas prokurorit special që e hetoi, Jack Smith.
Pas tensioneve në Capitol më 6 janar 2021, Smith ishte caktuar prokuror special për të hetuar përpjekjet e Trumpit për t’i përmbysur zgjedhjet e 2020-s në të cilat ai humbi.
Hetimi i tij kulmoi me një raport të detajuar të dorëzuar te prokurori i përgjithshëm, Merrick Garland.
“Këndvështrimi i departamentit se Kushtetuta ndalon vazhdimin e gjykimit ose gjykimin e një presidenti, është kategorik dhe nuk ka të bëjë me peshën e krimeve për të cilat akuzohet, fuqinë e provave apo meritat e prokurorisë, pas së cilës zyra qëndron plotësisht”, ka shkruar Smith. “Padyshim, në rastin e zotit Trump dhe kthimin e tij në Presidencë, zyra vlerësoi se provat e pranueshme ishin të mjaftueshme për të marrë dënim në gjyq”.
Trumpi akuzohej për rolin e tij në nxitjen e trazirave të 6 janarit, duke u akuzuar nga një panel i Kongresit se nxiti “komplot”. Ai akuzohej nga Departamenti i Drejtësisë për katër akuza, përfshirë “komplotin për të mashtruar”.
Trumpi në të gjitha akuzat u deklarua i pafajshëm.
Pas lirimit, në një shkrim në rrjetin e tij social “Truth Social”, presidenti i zgjedhur e quajti Smithin “prokuror të çmendur që nuk ishte në gjendje ta zgjidhte rastin pa u bërë president”.
Smith u largua nga Departamenti i Drejtësisë javën e shkuar. Ai akuzohej nga Trumpi se ka nisur hetimet me motive politike.
Pas fitores në nëntor të 2024-s, akuzat ndaj tij u hodhën poshtë, pasi Kushtetuta ndalon ndjekjen e një presidenti.
Trumpi do të inaugurohet si president i 47-të të hënën. Javën e shkuar ai u dënua, por pa burg a gjobë, për 34 akuzat për dhënien e parave për heshtjen e një ylli për të rritur, gjatë zgjedhjeve të 2016-s.
Marrë nga Koha.net
