Ukraina dhe aleatët e saj po vlerësojnë një kompromis të mundshëm që do të përfshinte hyrjen e Kievit në NATO në këmbim të një zgjidhjeje diplomatike për territoret e pushtuara nga Rusia.
Lajmin e bën të ditur Financial Times, duke nënvizuar se si diplomatët evropianë besojnë se duhet të ketë garanci të rëndësishme sigurie në një zgjidhje të mundshme të negociuar, në të cilën Rusia ka “de fakto, por jo de jure” kontrollin e territoreve të okupuara aktualisht ukrainase.
Territore që duhen rikuperuar me kalimin e kohës përmes kanaleve diplomatike.
Ideja e cedimit të territoreve dhe fitimit të hyrjes në NATO “mund të jetë e vetmja mundësi”, por, vërejti një diplomat perëndimor, është një tabu për Kievin, të paktën në publik.
Për këtë arsye, natyra dhe koha e garancive të sigurisë që Ukrainës do t’i duheshin për të mbështetur një marrëveshje në këtë kuptim janë në qendër të debatit. Një marrëveshje nuk është e lehtë edhe mes aleatëve.
