Demokracia nuk është në gjendje të mirë, ka deklaurar të dielën Papa Françesku, teksa u ka kërkuar politikanëve të shmangin populizmin dhe në vend të kësaj të punojnë së bashku për të ndërtuar shoqëri më të forta dhe për të trajtuar apatinë e votuesve.
Duke folur në një konventë vjetore katolike romake për çështjet sociale, Papa ka thënë se shumë njerëz ndihen të përjashtuar nga demokracia, derisa të varfrit dhe të dobëtit janë lënë të kujdesen për veten e tyre.
“Është e qartë se demokracia nuk është në gjendje të mirë shëndetësore në botën e sotme”, ka thënë Françesku.
“Le të mos mashtrohemi nga zgjidhjet e lehta. Le të jemi të pasionuar për të mirën e përbashkët”, ka shtuar ai, duke nënvizuar dëmin e shkaktuar nga “korrupsioni dhe paligjshmëria” politike.
Ai ka thënë se ishte e rëndësishme t’u mësohej fëmijëve rëndësia e vlerave demokratike, duke paralajmëruar se “indiferenca është një kancer i demokracisë”.
Vizita gjysmë-ditore në Trieste pasoi udhëtime të ngjashme në Venecia dhe Verona në prill dhe maj, dhe një fjalim drejtuar udhëheqësve të Grupit të Shtatë në Italinë jugore në qershor, daljet që kanë testuar qëndrueshmërinë e tij pas sëmundjeve të përsëritura gjatë vitit të kaluar.
