Presidenti rus, Vladimir Putin, ka vizituar një qendër komanduese ushtarake, ku është informuar nga drejtuesit më të lartë të ushtrisë ruse për zhvillimet e fundit në frontin e Ukrainës. Lajmi u konfirmua nga zëdhënësi i Kremlinit, Dmitry Peskov.
Sipas pamjeve të publikuara nga Kremlini, Putin u prit nga kreu i Shtabit të Përgjithshëm, Valery Gerasimov, në një pikë të përbashkët komanduese të forcave ruse. Aty, Gerasimov raportoi se trupat ruse kishin marrë nën kontroll qytetet Pokrovsk në rajonin e Donetskut, si dhe Vovchansk në rajonin e Kharkivit.
Ndërkohë që negociatat për paqe vijojnë, Putin e vlerësoi marrjen e Pokrovskut si një zhvillim kyç që, sipas tij, do t’i mundësojë ushtrisë ruse të avancojë më tej në objektivat e saj.
Ministria ruse e Mbrojtjes publikoi pamje të ushtarëve të saj në qendër të Pokrovskut të Ukrainës.
Ndërkohë, autoritetet ukrainase nuk kanë konfirmuar marrjen e ndonjërit prej këtyre dy qyteteve.
Putin do të presë të dërguarin special të presidentit amerikan, Steve Witkoff, ku do të diskutojnë mbi negociatat e paqes me Ukrainën. Më herët, Witkoff dhe senatori Marco Rubio zhvilluan bisedime me negociatorët ukrainas në Florida, të cilat i konsideruan si produktive.
Marrë nga Ria Novosti
