Konglomerati indian Adani do të investojë 100 miliardë dollarë në ndërtimin e qendrave të të dhënave për inteligjencën artificiale në vendin e tij. Shuma është planifikuar deri për vitin 2035, siç u shpjegua nga kompania në samitin pesëditor të inteligjencës artificiale që mbahet në kryeqytetin Nju Delhi.
Investimi do të përfshijë një shpenzim shtesë prej 150 miliardë dollarësh të tjerë, për shembull, për prodhimin e serverëve dhe ndërtimin e infrastrukturës elektrike. Sipas një studimi të Universitetit të Stanfordit, vitin e kaluar India u rendit e treta në botë në konkurrueshmërinë e inteligjencës artificiale, pas Shteteve të Bashkuara dhe Kinës.
Samiti i inteligjencës artificiale me 20 kryetarë shtetesh e qeverish
Në takimin shumëditor në Nju Delhi marrin pjesë 20 kryetarë shtetesh dhe qeverish, si dhe drejtues të lartë nga kompanitë teknologjike, përfshirë CEO-n e Google, Pichai, dhe CEO-n e Open AI, Altman. India është vendi më i populluar në botë dhe ka një nga tregjet digjitale me rritjen më të shpejtë . Sipas organizatorëve, samiti pesëditor India AI Impact është samiti i parë i inteligjencës artificiale në rajon. Në fushën e inteligjencës artificiale, kompanitë me bazë në vende të pasura të industrializuara kanë ndikim të veçantë. Samiti është mbajtur më parë në Francë, Mbretërinë e Bashkuar dhe Korenë e Jugut.
Qeveria njoftoi së fundmi se kompanitë e huaja që përdorin qendrat e të dhënave në vend për shërbimet e tyre globale në re (cloud) nuk do të paguajnë taksa deri në vitin 2047. Google njoftoi në tetor se do të shpenzojë 15 miliardë dollarë për një qendër të dhënash për inteligjencën artificiale në shtetin Andhra Pradesh. Microsoft-i dhe Amazon-a tashmë kanë investuar miliarda në këtë sektor.
Marrë nga Deutsche Welle
