Pesë persona humbën jetën pas një sulmi me armë zjarri në qendrën Islamike në San Diego, ndërsa autoritetet amerikane vijojnë hetimet për motivet e ngjarjes tronditëse.
Shefi i policisë, Scott Wall, deklaroi se “nuk ka asnjë oficer policie të përfshirë në incident” dhe se informacionet mbeten ende paraprake.
Ngjarja ndodhi rreth orës 11:40 të paradites me orën lokale, kur policia mori raportime për një person të armatosur pranë qendrës islame. Dëshmitarët thanë se dëgjuan më shumë se 10 të shtëna armësh, që dyshohet se u qëlluan nga një armë gjysmë-automatike, pasuar nga të tjera pak çaste më vonë.
Një numër i madh forcash policore mbërritën menjëherë në vendngjarje, ndërsa rrugët përreth u bllokuan për arsye sigurie. Autoritetet thanë më vonë se incidenti konsiderohet i mbyllur, megjithëse hetimet vazhdojnë.
Raportimet mediatike mbi mënyrën se si humbën jetën të dyshuarit kanë qenë kontradiktore. NBC raportoi fillimisht se të dy personat e armatosur u vranë nga policia, ndërsa CBS publikoi një version tjetër, sipas të cilit njëri nga autorët u vra, ndërsa tjetri u arrestua.
Përveç viktimave, raportet tregojnë se disa persona të tjerë mbetën të plagosur gjatë sulmit.
Drejtori i Qendrës Islamike, imami Taha Hassan, e cilësoi sulmin “të papranueshëm për një vend adhurimi” dhe kërkoi mbrojtje më të madhe për objektet fetare. Ai falënderoi gjithashtu autoritetet për reagimin e shpejtë dhe mbështetjen ndaj komunitetit mysliman.
Edhe Donald Trump reagoi për ngjarjen, duke deklaruar se ishte informuar për raportet fillestare dhe se administrata amerikane po e monitoronte nga afër situatën.
Ndërkohë, guvernatori i Kalifornisë, Gavin Newsom, dhe bashkëshortja e tij Jennifer Siebel Newsom dënuan ashpër sulmin, duke e cilësuar atë “të tmerrshëm” dhe duke shprehur solidaritet me komunitetin mysliman të San Diegos.
“Njerëzit e besimit nuk duhet të kenë frikë për jetën e tyre. Urrejtja nuk ka vend në Kaliforni dhe ne nuk do të tolerojmë akte terrori apo frikësimi kundër komuniteteve fetare”, thuhej në deklaratën e tyre.
Qendra Islamike e San Diegos konsiderohet më e madhja në qarkun e San Diegos, me rreth 5 mijë besimtarë. Kompleksi përfshin gjithashtu një shkollë ku zhvillohen mësime fetare dhe kurse gjuhe. Në afërsi të saj ndodhet edhe një qendër hebraike.
Marrë nga CBS News
